《笑傲缸湖》「世紀騙徒」麥道夫逝世，究竟佢有咩咁把砲？

　　「曾經有句金句就係：「你欠銀行一萬蚊，你會怕銀行；如果你欠銀行一個億，銀行會怕你。」而呢位「世紀騙徒」欠落全球650億美金，前納斯達克交易所主席麥道夫（Bernie Madoff），原來係噚日（14日）於聯邦監獄中去世，享年82歲。

 

（AFP圖片）

 

　　可能好多人都唔知道邊個係麥道夫，對於佢嘅生平感到好奇，所以一下子搜查榜就上熱搜。其實有返咁上下年紀都可能聽過佢個名，皆因佢創造近50年最龐大「龐氏騙局」之一，受害人除咗明星、有錢佬之外，仲涉及好多間投資銀行。

 

　　麥道夫22歲就用5000蚊美金開辦自己嘅投資公司，當時係金融圈相當出名，而佢自己係1990更做埋納斯達克交易所非執行主席，可想而知幾咁把砲！其實佢嘅吸金手法同一般騙局差唔多，聲稱每年有8至12巴仙回報，然後將新客嘅現金當回報咁還返畀舊客；不過佢有樣野犀利就係識捉心理，例如佢只做熟客介紹嘅生意，令到投入嘅人覺得自己好有身份嘅感覺。

 

　　直到2008年，有客人向麥道夫要求贖回70億美金嘅投資，從而令到佢出現資金問題，後來佢個仔親手舉報佢，先發現麥道夫前後欺詐客戶650億美金，受害人達3.7萬人，遍佈全球136國。2009年麥道夫承認11到聯邦罪名，判刑150年，仲要償還170億美金。

 

據指當年佢個仔麥克．麥道夫有份舉報老豆，但最後抵受唔住壓力，係2010年自殺身亡，而細仔安德魯·馬多夫亦因為癌症係2014年去世，唔知係咪叫「報應」呢？（網上圖片）

 

　　你以為咁就完啦咩？一個出色嘅男人，真係去到邊到都好似漆黑嘅螢火蟲一樣，咁鮮明、咁出眾。就算佢坐緊監，都透過財技同智慧，去壟斷監獄入面每一包朱古力粉，獄友想沖杯熱朱古力飲，都要向麥道夫買，所以佢係監獄入面都依然係一個「大明星」，好多獄友都向佢請教金融意見。所以話，叻嘅人真係去邊到都咁叻。

 

撰文：任盈盈

 

【你點睇？】白宮記協晚宴爆發槍擊案，你認為事件會否提升共和黨在中期選舉的勝算？你認為特朗普會否被國內安全問題吸引，削弱對伊朗軍事動作力度？ ► 立即投票