《魚缸博客》長和賣港口點解港澳辦咁大反應？純粹都需要表個態

　　長和(00001)單「大刁」，正當市場讚嘆之際，港澳辦立即出聲，質疑長和為何輕易將這麼多重要港口轉讓給「不懷好意的美國勢力」，完全無考慮到國家民族利益。

　　博客覺得，畢竟呢件事係商業加政治決定，國家層面上一定要有人表態反對，大家先可以顧得住面子；調返轉講，假如呢個燙手山芋賣俾國家，1482億港紙呢口價，又會唔會有人想接呢？

　　退後一百步去睇，就算真係想針對長和做啲嘢都有難度，一來長和負債唔高，二來長和系業務遍布世界。之前都有文章講過「別讓李嘉誠跑了」，而家誠哥咪一樣中意去邊就想去邊。

　　巴拿馬運河呢單刁，博客覺得唯一一個失策地方，就係無問過中資會唔會有興趣TAKE個OFFER俾誠哥。國家收唔收返呢個港口，誠哥都立於不敗之地。國家收返，咁更好啦，國家對國家層面的政治事務，我商家佬唔想搞啦，你地自己玩；如果國家唔收，我問過你地唔要，我先賣俾美國佬，在情在理我都無錯。

　　有時候啲嘢太急，都係欲速則不達，而家單刁係做成左，但俾人抽後腳，可能誠哥唔怕啦，純粹呢個小風波可以避免發生咁解。

《編者按》本欄搜羅即市傳聞，惟消息未經證實，《經濟通》亦不保證內容之準確性。