十多年前到街市買餸，見到店舖經常都會賣玉子豆腐，售價平到差不多1蚊有1條，買定十條八條放入雪櫃，隨時想加餸就即時可以煮到，真方便 !

　　隨著時間的進步，凍肉店舖售賣的肉類及雜項款式都多，大家真係要得閒去行下，就容易找到好多食材係方便OL一族回家簡單就可以準備到一餐餸。

　　今期教授的「肉碎扒玉子豆腐」，免治豬肉隨時放工到超市都會買到，若然能預早一天晚上醃好，留待明晚放工時即煮，連等醃的時間慳番，而且肉又夠入味。

　　玉子豆腐蒸或煎都得，若想清淡一些，大家可以將此菜式改為蒸，再將炒好的肉碎鋪在豆腐上都可以。

烹煮時間: 15分鐘

份量: 2人

材料:

　　玉子豆腐 3條、免治豬肉 150克、蔥粒 少許、蒜茸 1茶匙

豬肉醃料:

　　生抽 2茶匙、砂糖 1/4茶匙、雞粉1/4茶匙

調味料:

　　老抽 1/2茶匙、蠔油 1茶匙、砂糖 1/2茶匙、幼鹽 1/8茶匙、胡椒粉 少許、粟粉 1/2茶匙、清水 3湯匙、麻油 少許

做法:

　　1. 玉子豆腐切成圓形，厚度約0.5厘米，備用。

　　2. 免治豬肉加入醃料拌勻，醃15分鐘。

　　3. 燒熱鑊，落少許油，將玉子豆腐兩面略煎至金黃色，盛起上碟。

　　4. 另燒熱鑊，落少許油爆香蒜茸，加入豬肉快手炒散，然後加入調味料煮2分鐘，最後加入蔥粒炒勻，將肉碎淋在玉子豆腐上即成。

韋太小貼士:

　　日本豆腐叫玉子豆腐，沒有黃豆成份，只是蒸熟的雞蛋，所以，玉子豆腐是已熟的蒸蛋，蒸或煎熱吃便可。