上個月一連四個星期教授 OL們做簡易食譜。今個月，韋太會一連五星期教授大家煮「簡易意粉」，簡易意粉製作容易，只要雪櫃常備一些急凍食材及配料，大家隨時隨地都能製作到。無論做午餐或晚餐都可以。

　　黑椒牛柳絲意粉就食得多，唔知大家有無試過用沙茶醬去炒意粉或炒河粉呢 ? 

　　那麼，大家又無到過潮州食肆，點一道菜式叫「沙茶牛肉炒河」 ? 

　　沙茶醬除咗可以做出惹味火鍋湯底，用來炒意粉、河粉都一樣惹味，大家不妨試下啦 !

烹煮時間:  10分鐘

份量: 2人份量

材料:

　　牛肉 150克、意粉 200克、洋蔥 1/2個、蔥段 適量(隨意)

牛肉醃料:

　　清水 2湯匙、雞粉 1/3茶匙、鹽 1/3茶匙、梳打粉 1/8茶匙、生粉1/2茶匙、清水 1湯匙

調味料:

　　沙茶醬1湯匙、生抽 1茶匙、老抽 2茶匙、砂糖 1/2茶匙、幼鹽 1/4茶匙、雞粉 1/2 茶匙

做法: 

　　1. 牛肉切逆紋，順序加入醃料大力攪勻至水份完全被牛肉吸收，放入雪櫃冷藏15分鐘。

　　2. 洋蔥切絲，備用。

　　3. 意粉按照包裝上的指引，水滾後加入少許油和鹽，放入意粉，煮8-11分鐘，烚熟後盛起瀝乾。

　　4. 燒熱鑊，下油2湯匙，將牛肉加入，快炒至8成熟，盛起。

　　5. 燒熱鑊，下油1湯匙，加入洋蔥爆炒至軟身，將意粉、牛肉及調味料加入炒2分鐘即可上碟。

韋太小貼士:

　　市面有急凍牛仔肉售賣，價錢又經濟實惠，平日買定1-2塊存放冰格，用時解凍便可。