《小傳日記》波叔除草事在必行？cut與唔cut都有好大空間！

　　《小傳日記》面臨千億財赤，波叔近期都應該相當頭痕，要cut「筆直」，但由邊度開始cut好，由邊度cut起先唔會令太多人唔舒服兼反對，正正就係頭痕之處。普遍政圈都認為，兩蚊長者乘車優惠係會「開刀」嘅對象，但目前都仲有好多反對聲音。

　　先睇返今年財政預算案公眾諮詢廣告，以往因「陳茂波」之名有幾年都用整餅做主題，但面對財赤，個餅一定要縮水，亦都好難再「無嗰樣整嗰樣」，所以今年波叔只係拿著個「淋到少少水」嘅水壺，變身做花王，為香港灌溉未來。而喺波叔廣告入面纜著嘅圍裙個袋入面，仲袋起咗「兩把嘢」，睇怕花王嘅工作除咗淋水之外，「修剪」都係事在必行，明面淋水，暗藏鋤刀。

　　咁乘車優惠係咪一定冇得留低呢？事關民生大事，要郁一定會有反應。以往兩蚊乘車優惠都被批評過執行上出現問題，除咗曾經話過有人「濫用」，亦都話長者經常長車短搭，令政府要負擔嘅費用增加唔少。乘車優惠佔政府經常開支喺上年度就佔咗0.7%，政府要向交通營辦商回水近40億銀，而且各界都有對修訂乘車優惠有唔少建議，包括訂立津貼上限、調整優惠價或者限定次數等等，亦有人建議只係開刀60至64歲人群，甚至有人建議直接cut咗佢，亦都有人建議可以拋波畀交通營辦商，要求佢哋負擔返部分優惠，但以目前港鐵(00066)同九巴狀況嚟睇，拋波畀佢哋嘅後果好大機會就係被「拋」返轉頭。

　　兩蚊優惠係作為一種福利，目標是為敬老以及養老，要cut相關優惠就相當於唔敬老，政府要企「道德低地」，而且老人家一向係政府同建制政黨嘅忠實擁躉，減福利可能會造成好大反彈。另外有意見提到今年係選舉年，改變民生政策好有可能會影響到年底嘅立法會選舉，不過現時選舉制度已經被完善，地方直選議席減少，黨派爭取選票壓力大減，為大局著想可能就要老人家犧牲一下，實在唔掂咪畀關愛隊「關愛」一下囉。不過講就咁講，政府就算慳多十億八億，又可以為未來規模幾十甚至幾百億嘅基建貢獻幾多呢？麵粉剩番唔係好多，波叔整餅要量力而為，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。