《小傳日記》又一家地產商老闆被捉！債務違約躺平被算舊帳？

　　《小傳日記》春節前後內房又再多事，繼上次萬科總裁被傳遭公安帶走後，今次輪到正榮地產(06158)大股東歐宗榮官宣被捕，話就話涉嫌違法犯罪，但又冇講明犯咩罪，又冇講公安採取咗咩「強制措施」，實在好難唔俾人聯想到公司債台高築冇錢還。今日正榮地產股價跌咗超過8%，但投資者早就不抱期望，股價仙來仙去，跌多少少實在冇乜所謂。

　　有內地媒體放風話，歐宗榮今次被捉，可能同十幾年前福州一場土地拍賣有關。話說喺2013年12月，福州拍賣嘅其中一幅地塊位置夠晒吸引，起拍價35.67億人仔，樓面價每平方米6064蚊，吸引咗一眾開發商入場，當中包括正榮同泰禾。不過呢塊筍地竟然幾乎係底價畀泰禾攞咗，溢價率得0.57%。消息話，泰禾幾次喺福州嘅土拍中都遭遇了正榮，而其勝出過程可能涉嫌「圍標」，所以今次歐宗榮先會被捉。

　　講就咁講，但係內房企業早年喺土地拍賣市場心照不宣「打配合」，可以話係公開嘅秘密，係為咗彼此唔好亂咁叫價，和氣收場，就連貴為央企嘅華潤置地(01109)都曾經因為被指控圍標而被上海政府限制買地三年。正因為咁，正榮地產老闆因為十幾年前嘅一場圍標舊案被帶走，反而令人有更多遐想。

　　正榮地產算係比較早爆發債務違約嘅內房企業，公司股價喺2022年2月11日午後突然直插85%，一個鐘內由3.72蚊跌到0.68蚊，單日市值蒸發超過100億人仔，當時有消息傳出，正榮因為冇錢還2億美金嘅永續債。正榮一開始仲試圖掩飾，出公告話冇問題，但僅僅七日之後就自打嘴巴，宣布預計無法償還3月到期嘅債務，正式宣告爆煲，自此踏上咗漫長嘅化債之路。

　　正榮地產2023年尾推出咗第一版境外債務重組方案，計劃以新票據置換舊債，仲用公司資產作擔保，到咗2024年4月，距離成功重組僅一步之遙，正榮地產突然主動申請取消法院聆訊，搞到好多人摸唔著頭腦。到今年年初，公司宣布重組支援協定已經失效，話要重新傾過，可以話正榮地產爆煲三年來境外債重組係零進展，喺神州當局眼中，可能已經有「躺平」嘅嫌疑！

　　無獨有偶，正榮地產接班人、歐宗榮三子歐國偉喺三日前宣布唔再擔任公司非執行董事，莫非想盡快一走了之？但天大地大都不及血親至大，如果有家族成員身在神州就更加係插翅難逃，都係諗下點樣幫爸爸甩難喇，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。