《小傳日記》侵侵靠「TRUMP」身價飆升，荷包「再次偉大」

　　《小傳日記》講到侵侵，真係冇得唔佩服佢撈錢嘅本事。最近，佢又搞咗個大新聞宣布推出自己嘅迷因幣「TRUMP」。呢隻幣真係一出就爆，發行價0.18美元，唔夠一日就飆升到30美元，仲一度衝到75美元嘅高位。一日之內，佢靠呢隻幣賺咗超過60億美元，真係令人目瞪口呆。有網友仲笑話，侵侵祖宗三代努力先累積嘅家族財富，竟然俾佢發條post就搞掂晒。

　　商家佬永遠走在時代尖端，只要有錢賺咩都肯試，侵侵玩呢啲新技術賺錢已經唔係第一次。早喺NFT市場火熱嘅時候，佢就靠賣自己嘅NFT數碼卡撈咗720萬美元，佢另外仲持有大額以太幣。佢啲NFT設計老實講真係冇乜特別，但就係靠住佢「侵侵」呢個IP，再加啲限量發行嘅玩法，成功吸引到一大班粉絲買單。

　　不過，侵侵嘅撈錢手段梗係唔淨係依賴加密貨幣同NFT。佢仲係一個實至名歸嘅「帶貨達人」。參選途中，佢仲親自出席鞋展，推佢自己品牌嘅「永不放棄高幫運動鞋」，呢雙鞋金閃閃嘅鞋身，加埋美國星條旗嘅圖案，再配上佢個大寫「T」嘅Logo，賣399美元一對，限量1000雙，硬係俾佢炒到成為熱賣商品。除此之外，佢仲賣限量版吉他，琴頸印住佢最出名嘅口號「讓美國再次偉大」，最平都要1250美元，而簽名版甚至賣到1萬美元。

　　除咗帶貨，侵侵又點少得名人賺錢嘅招牌技能出書呢？佢同佢仔成立咗一間出版社，專門出版同侵侵相關嘅書籍，例如《我們的共同旅程》，收錄咗佢第一個總統任期內嘅相片，版稅收入已經超過500萬美元。仲有本《致侵侵的信》，收錄咗唔少名人寫俾佢嘅信，都係一本賺錢嘅工具書。最誇張係，喺佢遭遇刺殺未遂事件後兩個月，佢竟然即刻出本《拯救美國》，將整個事件變成話題，書出版速度之快，真係令人嘆為觀止。

　　最後，梗係要提佢嘅社交媒體平台Truth Social。呢個平台本身係侵侵喺多個帳號被封之後推出嘅，目標係打造一個屬於佢同支持者嘅發聲平台。雖然Truth Social嘅財務狀況被外界批評為「荒謬」，去年前三季度輸咗3.6億美元，但就因為有侵侵個人品牌效應撐住，呢間公司嘅市值竟然超過86億美元。侵侵持股60%，因為平台值錢，佢嘅身家都自然跟住升。

　　而家侵侵仲未上台，佢成日掛喺嘴邊嘅名言「讓美國再次偉大」，會唔會真係成真仲係未知之數。不過，有一樣嘢可以肯定，就係佢自己嘅錢包就真係「再次偉大」咗！由迷因幣、NFT到鞋、吉他，再加埋出書同Truth Social，佢稍稍展示下財技，就賺到盤滿缽滿。咁睇嚟，佢嘅「Make America Great Again」唔知成效如何，反正佢嘅荷包就一定「Great Again」呢，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。