《小傳日記》周大福創建發換股債，係咪會益新世界？

　　《小傳日記》等錢還債嘅新世界(00017)近期賣出五伙豪宅，套現兩億銀有多，平均呎價3.4萬銀，有量有價即時令孖屐對佢鬆一口氣，而同日周大福創建(00659)宣布發換股債，更加引發孖屐猜想。

　　身為系內定海神針嘅周大福創建理論上唔等錢使，但今次換股債籌7.8億銀，就令人有更多想法。周創建話所得資金會用於一般企業用途，包括但不限於補充營運資金，及償還集團部份債券及貸款的本金及利息，並無提過新世界，但等錢使嘅係新世界，孖屐就自然認為周創建撲水就係為咗救新世界。

　　事實上有咁嘅猜測都非常合理，以新世界目前嘅債務水平，再發債用嚟債冚債已經無乜可能，就算真係發，目前新世界嘅債務評級都唔容易再發到債，更加唔好講有無人吼。但如果係用周創建名義發債，就容易得多，債息都可以平啲（年利率4厘），只要撲到水返嚟之後，再搵個名義科水入新世界，就完成「以創建之名」為新世界籌旗，不過今次只係籌得7.8億銀，算係小試牛刀。

　　而點樣可以將錢由周創建搬去新世界呢，鄭家對呢種玩法就最熟悉不過，因為前年鄭家先試過將周創建嘅控股權由新世界賣畀周大福企業，出售超過六成股權造價217.82億銀，當時就係由周企借收購名義灌水入新世界。而目前新世界同周創建都屬於周企嘅子公司，周創建拎筆錢入股新世界會令周企間接持股量提升，可能會引發按例提全購，所以周創建入股機會細啲，相反用買資產嘅手法就更為便利。

　　所以最後就係，周創建肯唔肯咁做嚟科水畀新世界呢？記得早排新世界先「賣」咗啟德體育園畀周企，造價只係4億銀多啲，對於新世界而言杯水車薪啦，令人懷疑鄭家係咪打算放棄新世界。目前周創建聯席CEO係純官二仔鄭志明，三仔鄭志亮做執董。當日大哥鄭志剛落馬當日鄭志明就曾經講明如果換著係自己，「做得唔好，換人好正常」，令人感覺似隔岸觀火，不過唔好唔記得，無論周創建、新世界定周大福(01929)，主席個名都係叫「鄭家純」，鄭志明都話自己係「打工仔」，如果「老闆」要你幫手，你都無得唔幫嘅，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。