《小傳日記》零跑汽車錄盈利震驚同行，增程式先係電車王道？

　　《小傳日記》零跑汽車(09863)唔聲唔聲嚇你一驚，噚日宣布2024年第四季度扭虧為盈，比原定目標提早咗一年，超車蔚來(09866)同小鵬(09868)，係繼理想汽車(02015)之後，第二家錄得單季度盈利嘅新勢力車企。講真，個個追住「蔚小理」同小米汽車嚟睇，真係冇諗過零跑可以殺出條血路。話說回來，理想同零跑都係增程式電動車嘅代表企業，咁係咪又一次證明咗增程式先係新能源車市場嘅王道呢？

　　回顧增程式電動車嘅歷史，其實一路都唔被主流車企睇好。當年理想推出第一台增程式車理想ONE嘅時候，成個行業都當笑話睇。長城汽車(02333)嘅高管李瑞峰話增程式係落後技術，仲直指係用嚟割韭菜；福士嘅內地負責人威德曼更加話討論增程式技術根本已經過時。但好諷刺嘅係，增程式電動車賣得好就係事實，根據中汽協嘅數據，單係2024年頭11個月，增程式車型銷量同比增速達到99%，成為增速最快嘅細分市場。相比之下，純電新能源車嘅增速得26%，插電混動車型就同比增長93%。

　　增程式電動車嘅最大特點係車內設有燃油引擎，但只係用作發動車內發電機，為汽車提供動力，又有引擎又有電機，有人批評呢種設計不單止多此一舉，而且會造成能量損耗，不過好處係都明顯嘅，就係可以通過燒油充電，解決新能源車嘅續航問題。長途旅行嘅時候，純電車最怕就係冇電，尤其喺神州春運塞車嘅墟撼場景，平時四個鐘嘅路程可以開整日，部車喺路中間郁都唔郁得，驚冇電都唔敢開暖氣，好唔容易捱到服務區，充電樁又排曬長龍，而增程式電動車嘅車主就冇呢個煩惱，只要附近有加油站，車就可以繼續走。

　　除咗解決用戶焦慮，增程式對車企嚟講仲係條最容易賺錢嘅路。增程式汽車嘅技術結構相對簡單，成本比油電混動或者純電車都低。油電混動需要兩套完整嘅動力系統，純電車又要用大容量電池，但增程式只需要喺小容量嘅電池上邊加個小型增程器，就可以做到電動車嘅效果。咁樣唔單止降低咗造車成本，仲提升咗利潤率。相關報告話，理想ONE嘅動力成本只佔整車成本20%，而改為純電車型有可能超過40%。

　　增程式電動車嘅成功，仲吸引咗其他車企加入呢條賽道。好似小鵬(09868)、極氪、廣汽埃安(02238)，都喺近半年宣布會推出增程式車型。當然，唔係所有車企都妥協，堅持純電嘅品牌仲有第三季季度淨虧損繼續擴大嘅蔚來(09866)，蔚來董事長李斌喺年底接受訪問嘅時候就話：「純電係終極方案，我哋對純電好有信心。」但問題係，蔚來如果一路堅持純電路線，又冇辦法解決虧損問題，咁可能真係會變成「用信仰嚟造車」嘅典型代表。蔚來董事長李斌話對純電有信心，希望投資者對李斌都仲有信心啦，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。