《小傳日記》推進北都個個都扭計，要成功上馬仲有好多關？

　　《小傳日記》北部都會區即將上馬，早排港府大鑼大鼓搞記者會，安排一堆企業同發展商簽定無約束力嘅意向書，嚟展示當局發展北都嘅決心，令大家都意識到今次要嚟真，講到最真當然係港鐵(00066)，率先放風自己盤數，表明唔可以「攬曬上身」。但原來除咗港鐵之外，各大地產商都喺度同政府拗手瓜。

　　早幾日有傳媒引述「消息人士」報道，話港鐵面對未來10至12年嘅高額開支，有可能要賣商場籌旗。市場解讀上市公司好少自己放風財困，今次自己爆大鑊被視為向政府「扭計求科水」。政府當然都知港鐵意圖，回應話會考慮善用「市場力量」推進項目，即係發債叫市民籌旗。對於港鐵明目張膽同政府攤大手板，孖屐意見不一，有評論甚至直接建議持有七成半股權嘅政府直接私有化港鐵就一了百了，仲可以令市民唔使捱貴車費。

　　雖然係咁講，但引發呢場港鐵同政府之爭嘅最大原因，其實就係市道唔好，令政府同港鐵都同樣等錢使。先唔講港鐵，政府千億財赤就已經令政經各界知道政府冇得坐吃山空，喺北都上馬之際，造價6至7億、位於灣仔「黃金地皮」嘅北都展館，由於社會觀感不佳，唔少立法會議員都認為政府要審慎考慮逼切性問題，應該更加關注成本效益；至於香江另一個大Project「明日大嶼」時間表就一再推遲，原定今年年底開展嘅填海工程，睇怕都難以落實。

　　大家都知北都嘅發展藍圖係超超超前嘅，亦意味住需要超長時間先會收支平衡，政府推進北都並唔係完全出於經濟因素，所以發展北都嘅意欲從來都係政府比發展商為急，再加上花旗國減息進程愈減愈慢，令到地產商愈來愈唔敢輕舉妄動。據講近期地產商都經議員向政府游說，要求包括減少審批進程，以及保證北都規劃唔會五時花六時變，咦，唔知係咪影射緊啟德呢？

　　最大問題係由於香江土地財政最近失靈，港府自己都千億財赤上身，未來仲可以投入幾多錢入去發展北都呢？可能又係要繼續發債，不過港府當然會講，發債係希望為市民提供「安全可靠、回報穩定的投資選項」，讓市民對香港基建項目有更大嘅「參與感」同「獲得感」，計我話，港府有嘅係「我呢排都賺夠喇係時候畀人賺吓」嘅「鬆弛感」。商界支持政府規劃，同時希望項目唔會蝕錢，都係人之常情，政府未來要氹掂港鐵同發展商搞好北都，仲有好多工夫，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。