《小傳日記》港股連跌四年終反彈夠晒威？美股比特幣風景更好！

　　《小傳日記》話咁快一年又過去，唔知各位朋友仔年初定下嘅目標實現咗幾成呢？就算進度係0都唔緊要，希望在明天，人無事先有機會做世界冠軍嘛！不過如果閣下嘅年度計劃係理財的話，咁今年回報就理應唔錯，恒指全年升咗3012點或17.7%，中斷連續四年下跌嘅歷史記錄，83隻藍籌股入面有48隻全年都係上升嘅。如果你貼中小米集團(01810)就最醒目，全年升幅高達1.21倍，事關小米今年搞作多多，年初話賣車，下半年出旗艦手機，明年仲可能要做埋AI大模型，名副其實全家桶。

　　缸友揀中美團(03690)都唔錯，公司第二三季業績夠靚仔，拼好飯業務號稱外賣界「拼多多」殺入下沉市場，美團優選、小象超市等新業務都算有亮點，至於無人機空投距離商業化仲遙遙無期，不過食中國家力推低空經濟，總體而言交出高分答卷，支持股價全年升咗85.2%。

　　值得一提，中字頭受惠「收息之選」+「市值管理」兩大利好，今年表現都唔錯，尤其係四大內銀即使遇上寬鬆周期，股價都照升不誤。有專家話，雖然特朗普上台或為中美貿易帶來更多不確定性，但相信情況未至太差，人民幣都未必大幅貶值，股民揸住中特估概念都無妨。

　　如果唔局限於本港，咁投資回報可能更加豐厚。花旗國錢多水浸加上科技明星代有人才出，帶動美股keep住破頂，神州網民最愛嘅「定投納指」策略贏到開巷，納指全年升咗超過三成，曾經仲破過兩萬添。如果投資者買VOO（先鋒標普500指數ETF），都可以享受到約25%嘅年升幅。

　　美股之所以有今日，當然要多謝皮衣男黃仁勳啦，英偉達憑住生產AI晶片躺贏，過去一年市值增長咗1.85倍，一度超越蘋果成為全球市值最高公司，而且其AI龍頭地位仲幾穩添，唯一要擔心嘅AI商業化前景不如預期，咁就可能要進入調整期啦。

　　至於另一個喺孖屐呼風喚雨嘅男子馬斯克，雖然旗下特斯拉嘅新車銷售面臨挑戰，自動駕駛同無人的士嘅發展都未如理想，但係馬斯克今年喺其他領域做咗兩件大事，一係SpaceX筷子夾火箭技術震撼全球，二就係成功造王，靠銀彈攻勢同網絡聲量推動特朗普重新入主白宮。今次子憑母貴，特斯拉股價喺第四季成功起飛，全年股價都有68%嘅升幅。

　　講到特朗普又點可以唔提加密貨幣呢？特朗普話過上任之後會增設官員管理加密貨幣，意味加密貨幣得到「名分」，以後可以抬起頭做人，呀唔係，做幣至真。特朗普當選之後，虛擬幣市場一片沸騰，龍頭大哥比特幣一年內面值暴漲1.2倍，一枚幣升值超過5萬美金，去到9.3萬美金，十年前如果儲多幾枚，而家夠喺香江full pay買一套三房單位嚕。

　　新年新希望，嚟緊西方各國通脹已經回落，雖然關稅戰一觸即發，但相信唔會影響貨幣寬鬆經濟踩油發力嘅大趨勢（日本除外），至於神州失去房地產引擎經濟失速，不過就一直努力尋找新發力點，財政貨幣明年會共同發力刺激經濟，以求脫離流動性陷阱，加碼寬鬆可期。筆者在此預祝各位新一年獨具慧眼，喺大時代收穫平安同財富，請請。

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。