《小傳日記》美股怒炒量子科技，故事講到天花亂墜但都係未盈利

　　《小傳日記》最近美股量子科技股炒到飛天喇，全部都係靠谷歌推出嘅新量子晶片Willow做大旗。呢粒晶片成為科技圈熱話，據稱佢5分鐘完成嘅計算，等於現時最強嘅電腦要計算「10的25次方」年先搞掂！

　　咁誇張嘅成績，莫非「量子時代」終於到來，難怪美股炒到癲曬。Quantum Computing呢間公司由11月開始，短短一個月股價升咗10倍！仲有D-Wave Quantum都升咗8倍，單日內升近25%；至於Rigetti Computing兩個月內都升咗10倍！但問題係，呢啲公司全部都係處於虧損狀態，就算係美股量子科技龍頭IonQ，2023年都虧損咗1.58億美元，2024年仲要繼續蝕幾千萬。

　　同樣係量子科技概念，神州比較有優勢嘅量子通信概念股亦係虧損狀態。號稱量子計算第一股嘅國盾量子(深:688027)，喺2020年至2023年連續三年虧損。2023年扣非淨利潤蝕咗超過1.5億銀人仔。

　　咁點解搞量子科技咁蝕錢？從國盾量子嘅財報就可以睇出，2021年至2023年，佢每年都用成接近收入100%去做研發，好似掟錢落黑洞咁。國盾量子董事長應勇就話，佢哋寧願繼續虧損，都唔會為咗「盈利」而砍掉研發，因為量子科技嘅未來仲未到，依家只係鋪路階段。

　　量子科技講嘅故事好聽，但實際上距離商業化仲有好長好長嘅路要行。英偉達嘅CEO黃仁勳都曾經講過，量子電腦可能仲要10到20年先會真正實現工業化，依家只係一個技術探索同概念驗證階段。

　　所以，想投資量子科技嘅朋友真係要小心啲，唔好以為升得快就一定有得賺，呢啲公司可能只係講故事嘅高手，燒埋燒埋咁多錢都未必有好報，玩短線炒炒波幅無所謂，但如果你諗住長期投資，咁就要有心理準備--呢場「量子夢」可能要等好多年先會醒，至於網上面話銀行帳戶密碼甚至係比特幣私鑰都有可能遭遇「量子威脅」，聽講呢幾年內都唔會成真，咁就留待專家慢慢應對喇，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。