同事Y從老細房出來，面有難色地返回座位。經過幾番「套口供」式對話，仍然徒勞無功。情況同有心事嘅女朋友無異，「你係咪唔開心呀？」「唔係呀。」「有咩事可以同我講喎。」「無事呀。」

　　「我今朝遞咗信。」食飯時，同事Y終於將真相說出。

　　「發生咩事？」同事Y平日事事辦妥，人人看好他在今年內有機會升職。說辭就辭，比事業發展如日中天的女星說要嫁人來得更突然。

　　「我辭職但被拒絕，之後仲畀人訓示一大輪。」往後的內容大概圍繞老細如何說明80、90後的抗壓力低 、自我中心、唔捱得bla bla bla。

　　現世代沒有人打死一份工，但不代表個個都懂辭職。講完辭職後，你會如何回應老細3大反應？

1/ 留才攻勢

　　- 「你有咩要求即管開聲，人工方面我地可以再商量下。」

　　- 「你辭職對公司係一大損失，話晒條Team你都跟咗咁耐。」

　　- 「與其裸辭手停口停，不如留多兩個月邊做邊搵啦！」

　　應對法︰不論老細真心定假意，這種情況是最難收拾的。面對以上攻勢，記緊要要將「辭職」話題拉回重心，並禮貌地表示謝意（多謝老細又好，多謝有糧出也好），最後再重申自己的決定。如非必要，切勿向老細透露自己的去向，免得夜長夢多。

　　例︰「好多謝你對我嘅信任，但我認為而家係一個合適嘅時機畀自己出去闖下，所以未來一個月我希望可以做好交接工作。」

2/ 訓示無極限

　　- 「都話而家啲後生唔捱得架啦。」

　　- 「公司對你不薄，點解你係呢個時候咁不負責任？」

　　- 「係咪搵到新工？其實呢行轉去邊都一樣，出面未必好過我哋。」

　　應對法︰當老細有這樣反應時，有機會他已經知道你的去向。不論是自己唔小心洩漏風聲，還是被公司「老死」出賣，都要沉住氣。要知道如果轉工非轉行，得罪前老細是無好處的；即使轉行甚至唔再打工，也犯不著與全世界反面。

　　例︰「多謝你關心！其實我考慮得好清楚，希望你會尊重我嘅決定。」

3/ 玄機處處的祝福

　　- 「辛苦晒你，記住要飲水思源。」

　　- 「大公司咪又係不外如是，都係我睇佢好，佢睇我好嗜。祝你好運！」

　　- 「將來想返嚟幫手，我隨時歡迎。」

　　應對法︰作為最後祝福，就不會理會呢句說話究竟有無骨，只要用一句起兩句止的好話回應，找到大家的下台階，好聚好散就可以了。

　　例︰「多謝晒！我都希望公司以後有更好嘅發展，生意蒸蒸日上。」

　　總之，辭職與分手一樣︰以和平為大前提。畢竟，地球是圓的。