港女心目中男神標準：有錢帥三倍？

　　日前播出的港台節目《我係乜乜乜》，找來10多位女士票選男神，當中有趣一幕惹來網絡熱議，被指揭露港女的拜金一面！

　　事緣兩名候選男神，一位是35歲的華人置業主席劉鳴煒，一位是25歲的新晉演員兼導演游學修，兩人初時均藏於布幕後，不顯露真身，女士只憑他們的對答表現投票，結果游學修以11票比2票大比數領先。

　　但當布幕掀起，兩人身份曝光後，再容許女士改選擇，不出10秒即有多人極速轉軚，劉鳴煒成功逆轉勝，取得8票，壓倒游學修當選男神。

　　有改投劉鳴煒的女士稱，「樣、package（組合），好似呢邊好啲，所以我揀呢邊」、「成熟穩重……隻眼真係好靚，我好鐘意」、「（揭幕後）即刻覺得佢個人有自信」。

　　「男神」應具備什麼條件？英俊？有錢？勝出「男神」選舉的青年事務委員會主席劉鳴煒對票數逆轉亦感驚訝。他認為，票數逆轉原因與其外貌、背景有關，大嘆「港女真係好現實」。

　　游學修在個人專頁上回應指與劉鳴煒接觸過後，覺得他是個大方得體禮貌的上流人不過「太上流，掂唔到地」，游學修坦言相信有人真心覺得劉鳴煒「靚仔過我先轉軚」，同時表示「唔緊要，我另一半唔係好理呢啲。」

　　游學修的女友蘇麗珊，則在專頁上載節目截圖寫道：「試下唔好下下向錢看，人生會快樂好多。而且，有啲嘢係比家底與外貌更重要。」

　　節目播出後，旋即惹來網絡熱議，有人直指港女「好現實」，有人同情游學修在節目中的遭遇，亦有人指選擇劉鳴煒是明智之舉！

　　網友Patrick Yiu表示「睇咗成集，見到嗰啲女士揭開個白色屏幕轉呔嗰個反應，我真係覺得好似90年代周星馳嗰啲笑片橋段一樣⋯」網友Cheng Kwok Keung笑言節目中的女士「一見到劉鳴偉就飛擒過去！走遲步都執輸咁！」

　　網友Anson Kwok指「最正係有個女士指住自己個樣同劉生講：『你個market就係我呢種啦』，雖然鏡頭無影劉生個反應，但估到佢會答唔係掛！」

　　網友Cindi Kwok 慨嘆「有啲香港人嘅價值觀念都係好睇外表、富有、物質觀念重要過你嘅才華、人品…人性好現實！」

　　網友李凱欣坦言「有錢帥三倍，有車帥三倍，有樓帥三倍....」網友Keita Chan認為「大劉個仔都算係咁。EQ高，夠冷靜，有修養，如果佢喺節目中講既野唔係扮出黎既話，佢都算係最正氣既富二代。」網友Hong Yam 指「連選擇既自由都唔比人，點解選劉要被罵？」網友Ling Yun Wind 認為「只係一場誇張造作既鬧劇，何需當真...」

　　網友Gavin Por則突破「盲點」，直言「其實（游學修）有蘇麗珊都贏晒啦！」