Godiva買一送一 : 「打蛇餅」兩粒鐘食唔到 引公關災難

　　買一送一優惠，真的不要？俗語說「有食唔食罪大惡極」、「執輸行頭慘過敗家」，香港人當然都「唔執輸」啦！朱古力專門店GODIVA昨天第一日推出買朱古力軟雪糕（原價$45），可享買一送一優惠，吸引大批市民到各分店排隊！（延伸閱讀：【限定3日】 Godiva朱古力軟雪糕買1送1！）

　　香港人「為咗食雪糕，可以去到幾盡？」，各區GODIVA分店門外都大排長龍，「閒閒地」都要等上一小時，例如九龍塘又一城及屯門分店，「蛇餅」足足圍了一個圈，GODIVA一度貼出等候時間要120分鐘！

九龍塘又一城GODIVA分店門外

屯門GODIVA分店門外

中環IFC GODIVA分店門外

　　排完一個鐘，終於食到當然開心啦！不過有人去到就已經截龍，或者係因為雪糕機壞機而吃不到就感到相當不滿，於是就上Godiva facebook專頁「狂插」這個優惠「搵笨」，不滿Godiva事前沒有表明係限量優惠，甚至以機件故障為由停止優惠。

　　不少市民在官方facebook留言，批評多間分店「截龍」。網友Mabel Cheung批評：「我剛剛去沙田間分店，已經截了龍，問職員幾時再有供應，佢答我聽日同後日都有，但都係先到先得，好多打工仔都係返office hr，難道叫人唔返工就為了食雪糕？」

網友May Lee去到朗豪坊分店才發現「冇得食喎！」

　　網友Ricky Wong批評「做得promote就預人多，一間又話賣哂，另一間又話壞機，朱古力專門店冇朱古力，等如銀行冇錢，馬會冇馬跑。」

　　不過，亦有不少網友指責這些人是太「貪少便宜」，網友Molly Lee表示「唔明點解人排我排既心態，又唔係唔洗錢，好食都唔會浪費半個鐘排隊！」網友Bon Lee更稱「香港人睇自己時間價值好低！」不少網友笑言「排兩粒鐘為慳$22.5，仲低過最低工資。」

　　亦有網友同情GODIVA的員工，網友Kaykay Lee表示「見到張相真心覺得做死班員工囉，同為服務性行業既人表示深感同情…」網友Letitia Lo指「個個都鬧人冇雪糕賣，有冇諗過呢個promotion你地冇得食雪糕慘啲，定做死果班staff慘啲？」

　　網友Shiena Poon笑言GODIVA「應該要放兩隻乳牛係舖頭，唔夠漿就揸牛奶即時加工變雪糕漿，再唔夠就拉囇全世界嘅牛過來。」網友何虎亦笑言 GODIVA「數都唔識計」，指「小學生都知啦，香港700萬人，每人買兩杯，最小都要預有1400萬杯啦！」

　　雖然今次Godiva 買一送一引發了「公關災難」，但亦有網友覺得推廣成功網友Marcella Chan 認為「宣傳手法一流，買一送一即半價又算咩錢，今次廣告費賺返晒啦！」

　　黃之鋒亦在專頁轉貼Godiva排隊「盛況」，他指「如果聽日立法會有Godiva買一送一優惠（$45兩球雪糕），集會超過十萬人真係唔奇，香港人一向有種對排隊既執著，如果可以將依份執著同決心擺落社會運動就好啦。」

 （來源：TVB電視劇--天與地）