上帝好使得

　　五年前嘅一幕幕爭戰，又再重現眼前。主角換咗人，身份都對調埋，但係整個劇本嘅設定冇改變。在「中央祝福邊個？」競猜遊戲中，香港人連扮棋子嘅資格都冇，強弱對壘、搶提名票，強嘅一方聲稱要爭600票提名，強勢入閘兼欲嚇怕對手；弱嘅一方施展渾身解數，希望挾民望以令諸侯，躋身跑馬仔行列。攞番五年前有關特首選舉嘅新聞嚟睇，劃走梁振英、唐英年兩個人名，再套返林鄭同曾俊華入去，都係毫無違和感。另外有個人名連畫都唔使畫，就係始終都係陪跑嘅葉劉淑儀。 

　　香港人冇得揀，得個睇字，中共一向係幕後操盤人，殊不知，傳聞中林鄭嘅一句話，揭露原來連中共都冇牙力。因為，上帝先係幕後玩家，上帝叫我選，我就選。叫我唔選，我幾大都唔選。

　　報道指，林鄭喺1月12號嘅公務員研討會午宴時，以上帝之名，講出一句「上帝叫我參選」。林鄭曠古爍今，猶如先知聖人聽到天主嘅旨意，觸動天主干預中國特區選舉，相信未來幾年上帝必定係要喺香港有一番作為，甚至同林鄭嘅「上面」對抗？定抑或，林鄭係睇完本《與神對話》，之後睇到隱世嘅密碼，解讀上帝Only for Carrie嘅旨意？ 

　　全能嘅上帝喺香港政壇多次畀人搬出嚟，上屆選委容永祺就話上帝叫佢撐唐英年；梁美芬就曾經講過建制派係神畀佢嘅角色；由跑馬仔嘅人自己親身講，就有前財爺梁錦松，曾經多次「引述」天主允唔允許佢參選，不過佢個天主就有啲午時花六時變，一時就叫佢可能要去做，一時就話可能性極低。

　　如果報道屬實，林鄭甘願冒犯十誡當中嘅第二條：「毋呼天主聖名以發虛誓」，去換取愛天主又愛中國嘅選委支持，上帝一時間成為政治籌碼，好使好用，唔知基督教派選委又係咪會因為咁，跟從林鄭個上帝嘅旨意呢？ 

　　而且，我都係睇完報道先知，林鄭咁重視上帝意見。我仲以為，佢自己已經變身上帝添。睇吓林鄭處理西九嘅手法，有啲位真係好似行神蹟咁。嚴迅奇嘅身份，林鄭鍾意話佢係建築師，佢就係建築師，鍾意話佢係設計顧問，佢就係設計顧問，無論點，佢嘅身份都會切合規程，令林鄭唔會犯上西九條例。 

　　林鄭仲有「全知」嘅能力，佢知道香港人會好支持興建故宮館，又知道總會有少數人反對，更知道北京會因此而尷尬，所以佢就決定唔話畀大家聽要興建呢個館，還掂上帝係全能嘅，最後個館都一定會建得成。

　　林鄭當日記者會上嘅表情，的確係有全面回勇嘅跡象，回復當年「聲稱」嚴打新界僭建時，面對新界佬時嘅強硬，「好打得」。唔講嘅話仲以為有人喺香港僭建咗個假故宮，所以林鄭要派人即刻起返一個真嘅嚟抗衡添。

　　如果，好打得所打嘅對象，係一啲既得利益團體，係會令人肅然起敬。但如果打得嘅對象，係無權無勢、要求政府尊重程序嘅市民，佢就唔再值得人尊敬，更遑論用幾多眼淚去搏人同情。因為，呢位幾乎可自詡上帝嘅人，已經承襲咗大陸化嘅行事手法，沉淪為一個「好打手」。