「衰工」人人爭

　　為咗一份「衰工」，各路人馬又開始進入種種鬥爭模式，情況比起五年前，更加醜陋，更加可笑。

　　被689奉為政績嘅立法會宣誓風波，上星期白熱化，喺法庭裁定梁游二人上訴失敗後，乘勝追擊，律政司代表689入稟司法覆核，認為劉小麗、姚松炎、梁國雄、羅冠聰四名立法會議員無依法宣誓，要求法庭頒令四人喪失議員資格，史稱「DQ4」，法庭亦已批准司法覆核許可，下周四開庭審理。

　　DQ4上周五放工時間發生，曾俊華星期一成為DQ4後，第一個出席立法會答議員質詢嘅官員，會上佢主動讀出一份稿，話因為司法覆核進行中，根據律政司嘅法律意見，公職人員需要跟隨林鄭月娥之前寄畀立法會信件上所指嘅立場，亦即喺立法會上係唔會答DQ4議員問題，曾俊華呢個貌似Follow His Boss嘅決定，引來議事堂一場小風波，連建制派都對曾俊華決定表示不滿。

　　被曾俊華呢下突如其來嘅政治攻勢牽連嘅林鄭月娥，就急急朝令夕改，當日下晝話會回答全部議員嘅提問。同樣中箭嘅袁國強就唔回應。689見到咁，輿論未歸邊之時，喺星期二行會後例牌走出嚟笑笑口放箭，同事件撇清關係，話自己唔知呢個決定，再踩多腳話「不至於要拒答」，揭露曾俊華原來係Ignore His Boss，689完全唔怕將橫洲事變時仍然收收埋埋嘅港府高層分裂暴露於人前，亦正式確立梁曾二人敵對狀態，DQ4事件成為幾個人發功嘅表演舞台。

　　曾經話特首係一份「衰工」嘅曾俊華，而家都落力紥馬，唔理綠燈定紅燈都想照衝，有資深梁粉就批評，曾俊華呢一步，係錯判形勢，冇政治意識，顯示佢政治上唔適合做呢份「衰工」，但從側面去睇，佢做呢一步嘅政治盤算同His Boss有得揮，見到啲梁粉五毛咁大反應去鬧佢，似乎呢一步棋係令佢對手689未必有利。

　　早喺上個月釋法後，陳茂波曾經喺會議上宣讀由律政司所提供嘅法律意見，聲稱政府官員答議員問題，唔代表政府確認佢哋嘅宣誓合乎資格，會保留法律追究權利，都已經嘩聲四起。曾俊華無理由唔知道呢樣嘢，DQ4發生之後，由於法院連審都未開始審，官員就拒答民選議員問題，係人都知好難令人接受，喂阿哥，如果你政府入稟要DQ全部泛民，咁係咪全部人嘅問題都唔使答？

　　即使陰謀論啲去諗呢件事，似乎亦無不可，畢竟呢場選戰嘅明爭暗鬥好早已經令政界啲人耳語頻傳，多數都話自己係可靠消息人士，背後都係隱藏住一個個陰謀。講返正題，既然The Boss當初都去到咁盡，Always Agree With His boss嘅曾俊華自然就順水推舟，更何況有律政意見呢個擋箭牌，就不如將件事做到盡，逼從三巨頭要表態，食唔食呢隻鑊。

　　呢幾日嘅結果就顯示，曾俊華呢鋪唔只表忠咁簡單，689自己都知瀨嘢。明明就係佢本人要告呢一班議員在先，要置佢哋於死地，但而家就褪軚，「不至於」呢三個字，個人認為帶出嘅，就係嗰種皇恩浩盪嘅感覺，「我而家係告你呀，係趕絕你呀，但我都仲會答你問題嘅，還掂將死之人無用處，有嘢都係我下屬自己一人做出嚟。」泛民聽到咁，反而替曾俊感到不值，後續發展令佢喺事件不至於失分，689嘅支持者就冇放過呢個機會，替主子吶喊助威。

　　畸型制度，造就畸型玩法，相信未來半年仍然會層出不窮。例如，「賊喊捉賊」：可能會有啲人嘅Fans，寫文話畀人聽「嗱，衝紅燈好危險架，會影響香港整體利益㗎」，然後我哋就見到警方連續一星期嚴打行人亂過馬路，提醒人哋衝紅燈要承擔後果，但其實使乜警方提？五年前，真係有個姓梁嘅人衝紅燈，已經搞到港人雞毛鴨血。又例如，「橋唔怕舊」：可能有人半夜打畀選委，唔係Call佢哋去夜尿，而係話畀佢聽「我頭殼頂有綠燈，你撐唔撐我？」，還掂聖旨都未出，就不如放吓風，攞定啲票源，挾天子以令諸候，到時大局就喺我掌握之中，五年前姓梁嗰個咪又係用呢招。

　　還掂都係樣衰，不如真真正正喺真擂台決一勝負重來得爽快，而家日日喺度睇埋啲你虞我詐嘅深宮劇，實在難看。為咗爭奪黃袍，成為衰公中嘅衰公，你哋可以去到幾盡？