第一次同大家見面，希望我呢位口袋無料但腦袋有啲料嘅90後，可以喺金股匯傳統投資工具以外，發掘到一啲另類投資畀大家，開開心心make money！早前政府宣布，因應疫情關係，今年4月至6月到期繳交18/19年俸稅、個人入息課稅及利得稅，將會自動延期三個月。舊錢可以再坐一會，就咁放喺度似乎有啲浪費，今日就幫大家做個小總結，睇下有咩短期投資產品，可以令到筆「稅金」坐大舊啲，大家可以賺多個錢對抗疫情，又或者疫後玩樂！

（Shutterstock 圖片）

另類選擇：比特幣

風險：＊＊＊＊(最高五粒星)

回報：＊＊＊＊

　　比特幣係近幾年嘅新興投資產品，由於佢係24小時制，就算打風落雨抑或公眾假期都照常交易，成為一眾投資者喺金股匯停市時嘅另類選擇。

　　比特幣交易唔算複雜，首先大家要開返個虛擬貨幣錢包，然後喺平台開個帳戶就可以進行交易。不過建議大家喺大平台進行交收好啲，起碼信得過先啦！自3月尾開始，比特幣幣價由5千幾美金一路升到7千幾，主要因為美股大幅波動，加上曾傳出北韓金仔病危，地緣政治風險因素又增加，所以比特幣愈升愈有！

　　但高回報就高風險吖嘛，比特幣之前都曾經試過閃崩曾經由最高峰16000美金碌至3000幾美金，而且目前世界各地未有比特幣嘅相關法例保障投資者，所以大家都要小心！

（Shutterstock 圖片）

定期存款賺迎新禮品

風險：＊

回報：＊

　　放喺銀行梗係風險低，雖然係回報率亦低，但大家千祈唔好睇少呢蠅頭小利，其實每間銀行都會做一啲迎新計劃去吸納存款，所以我地重點係迎新禮品以及短期存款利息！

　　例如而家渣打優惠，新資金的話，三個月一萬蚊美金定期存款，就可以賺到亞洲萬里通1200里；集友銀行做7日10萬人民幣定存，年利率都有6厘；而虛擬銀行眾安，現有客戶推薦朋友仔開戶就有200蚊現金獎賞！另外，而家香港有好多虛擬銀行剛剛發牌，佢地為吸存款，都推出一啲短期高息優惠，例如天星銀行3個月定存就有5厘，上限10萬銀！　

　　當然啦，大家要Mark返實邊日到期交稅，到時到候拎返舊錢去繳稅，一陣遲?要畀罰款就唔抵啦！

（Shutterstock 圖片）

品牌Crossover產品有水位！

風險：＊＊＊

回報：＊＊＊

　　iPhoneSE啱啱推出好hit，但旋即一街蟹貨炒燶曬，不提也罷！之前個個都「收緊」口罩，呢種戰略物資就梗係唔建議大家炒賣，賺到錢都過唔到自己啦！

　　近呢一兩年好多大品牌都做一啲Crossover產品，反而成為炒友新天堂！

　　例如幾個月前潮流品牌Supreme就同朱古力餅OREO合作，出過一款紅色包裝嘅Supreme X OREO餅乾，未開賣已經炒緊二萬幾蚊美金一包；但隨著供應增加，炒價都慢慢回落，而家Ebay都要賣緊70幾蚊港紙一包，連埋運費都可能要過百蚊。

　　點解要提呢個例子呢？因為近呢幾年好多潮流品牌，都會同其他品牌聯乘，推出一啲限量產品，一來可以製造話題，二來可以提高知名度。例如Prada同adidas，DIOR同NIKE等，有興趣嘅朋友都可以去抽籤；若然抽中，一轉手可能賺一萬幾千，食得仲深過抽中新股！

（Shutterstock 圖片）

新股識抽好油水

風險：＊＊

回報：＊＊＊＊

　　講開抽新股近期隻康方生物(09926)一手難求，中獎嘅缸友真係笑到飛起，抽中一手真係賺到「皮皮聲」。如果真係有多餘錢，抽新股真係一個唔錯嘅選擇。

　　但一年咁多隻新股，究竟抽邊隻先啱呢？關鍵在於牌子同熱度。例如一啲大牌子要上市，基本上抽一手半手都無得輸，好似憧憬今年內上市嘅螞蟻金服、字節跳動、陸金所咁，隻隻都有大孖沙喺後面撐住；另一方面，都要留意住券商孖展額，如果首半日或者首日都超額五六十倍甚至百倍，即係市場需求極大，用實彈入飛一手當買六合彩都抵。

　　不過股市投機點都有風險，如果借孖展，有咩唔對路就記得抽飛或者暗盤走人，千祈唔好同佢談戀愛呀！

（Shutterstock 圖片）

租夾公仔機做台主贏粒糖

風險：＊＊＊＊＊

回報：＊

　　最近熱話就係梗係一班夾公仔機嘅台主叫苦連天，因為政府「14日後又14日」咁停止娛樂場所營運，搞到佢地無生意開；又可能係租夾公仔機屢傳騙案發生，大家即時聞「機」色變，究竟係咪真係咁高風險呢？

　　事實上，近年來夾公仔開到成行成市，但想成為一名「台主」(即夾公仔機管理人)，除咗要留意台機附近有幾多人流之外，重要定時定候補貨，而且每日都要檢查下部機有無損壞；而且要等客仔容易出貨，台機先會「貨如輪轉」，風生水起。

　　有人可以三個月就翻本，有人一個月只係搵到個下午茶餐。有台主反映，呢一門生意其實只係「賺好少」，志在可以過下生意癮咁話。

　　今日就同大家介紹住咁多！往後將會為大家介紹更多千奇百怪嘅投資趣聞，同埋講解下財經股壇嘅有趣知識，大家記得留意啦！