識破「控制狂」老闆︰5大攞膽特徵

　　「德少，對唔住，我真係做唔到落去。」同事遞信劈炮見得多，我亦非那種接受不到同事海闊天空、另謀高就的「盲塞」暴徒；然而遞信遞得如同事U這般無可奈何、不情不願的，倒還真是第一次遇見。

　　U一臉無奈，繼續︰「其實份工我真係OK架，同事基本上都夾到……」聽到「基本上」3個字，我就知道出事了。「基本上」這樣，「實際上」就是另外一回事。

　　U來自聞名不如見面的「死亡之添」，他已經是月內第3名辭職的同事。一條team好地地，之所以被冠名「死亡」，一team之首責無旁貸。對於這位team head，小弟卻果真束手無策，皆因他有他的本事，的而且確「跑到數」，名副其實的「吹佢唔脹」。

　　我心裏有數，不好意思問他辭職原因，不如換個方式，尋求雙贏。「一樣米養百樣人，周圍都有好人，正如度度都有夾唔嚟嘅部落。」我瞄瞄U，確定他有留心在聽，才說︰「呢個世界係有種人硬係鍾意控制人，我地要明白，去到邊都有。一走了之唔係解決問題嘅方法。信我，你咁走咗去，轉個頭又會遇番呢個蠻荒部族嘅族人。」

　　U是文明人，當然明白我的意思。「咁點算？」他問。

　　最怕你唔問，你問小弟定必言無不盡︰「千萬別好人當賊扮，先要揪出身邊潛在的控制狂徒。呢類人唔係自私，就一定係自卑。」

　　控制狂一般具有以下5大攞膽特徵︰

　　1、善於捉人「痛腳」——總是看見他人的弱點，對於別人的優點或長處，卻視若無睹；

　　2、吹毛求瑕——經典例子︰「你個document唔係用Calibri font size 12 2吋margin，我睇唔到囉。即刻改過send畀我，我1分鐘內要收到。」

　　3、繼而以子之矛攻子之盾——如遇上馴如綿羊的同事，不但不欣賞對方的善良，反而更極盡欺壓之能事，「你咁死蠢，我而家替天行道教精你咋」；

　　4、迫使對方放棄個人意願，以滿足他的一己私慾——總之全世界都要聽他的，他說一，沒有人可以說二；

　　5、貪得無饜——無止境地欺壓下去……

　　「咁即係死得。」U急不及待下結論。

　　「非也……」

　　待續……