「福祿壽」= 懷才必遇

　　TVB台慶，全台藝人傾巢而出，女藝人落力爭妍鬥麗，華麗性感晚裝、大曬珠寶，眼球大滿足，尤其打頭陣的肚皮舞，養眼又真跳得，好睇、吸睛，聰明的編排，大騷開得靚便士氣如虹，愈戰愈勇。接着各人施展渾身解數，做好台慶，能在群星中彈出，觀眾畀Like外，高層和幕後都有目共睹，增加受捧機會，星運亨通。

　　好像觀眾票選的「我最喜愛才藝表演」，由王祖藍、阮兆祥、李思捷做的棟篤笑「福祿壽講呢啲」大比數勝出。三子就是九年前在台慶扮演中港台巨星及反串扮女人搞笑，觀眾受落，從此三人取名「福祿壽」，專長扮嘢騷，成為他們事業的轉捩點，一時間Handelababy、大Ex、Hungry等反串角色街知巷聞，憑「福祿壽」三個字，他們開過演唱會，做綜藝節目，拍電視劇和電影，打穩基礎，三子單飛發展，各有成績，以王祖藍較為突出，成功攻入內地市場，又開設經理人公司，簽了多位TVB藝人，前陣子去過他在觀塘自置的公司，做得有聲有色。今年福祿壽再度合體，更純熟、更有默契，得獎是意料中事。「福祿壽」做好示範——懷才必遇。