《經濟不停學》一文話你知咩叫SPAC，造殼集資嘅另類IPO

　　最近有消息話，港交所（00388）開始研究特殊目的收購公司（SPAC）嘅引入機制，了解緊券商意見，似乎要同新加坡交易所搶飲亞洲區「頭啖湯」咁喎。其實SPAC係一種造殻上市嘅方式，喺美國好興，對於想上市嘅公司嚟講有唔少好處。

　　SPAC全名係Special Purpose Acquisition Company，唯一目的係透過首次公開發行（IPO）集資造殼，再去收購未上市嘅公司，等同令被併購嘅公司可以借呢個現金殼上市。而SPAC喺申請IPO嘅時侯，其實投資者係唔肯定會併購邊間公司，投資團隊只會披露有意收購嘅行業，投資者就好似開咗一張冇收款人嘅空白支票，所以SPAC亦可以叫做空白支票公司。

　　SPAC由IPO結束到完成併購通常會喺兩年之內搞惦，如果搵唔到值得併購嘅公司，SPAC就會清算解散，將錢還返畀股東，所以投資者最多都係蝕時間成本。

SPAC上市歷史悠久，慳家得嚟速度又快

百威亞太於前年7月取消上市，其後向朝日啤酒出售澳洲業務，同年9月正式於港交所掛牌。（吳藹林攝）

　　舊年美股總共有248間SPAC上市，佔IPO總數逾55％，總集資833﹒43億美金，按年大增逾5﹒1倍。而由今年初截至本月22日，已經有160間SPAC上市，佔IPO總數逾78％，咪話唔受歡迎。而其實SPAC上市喺美國90年代已經有，好似Burger King（BKW）同太空觀光服務公司 Virgin Galactic（SPCE），近期電動車企業法拉第未來、網上證券商Sofi、共享辦公室品牌Wework都計劃用咁樣嘅方法上市。

　　對於想上市嘅公司嚟講，呢種方式慳咗好多傳統IPO嘅繁瑣程序，例如搞IPO，公司要畀交易所「盤」，要接觸保薦人、賬簿管理人同經辦人等唔同持份者，定價仲要睇大孖沙面色。好似藍籌百威亞太（01876）當年咪試過差啲上唔到市，其中一個傳出嘅原因就係新股定價同國際投資者傾唔惦數。用SPAC方式要面對嘅只有SPAC嘅收購團隊，慳返唔少時間同錢。

併購靠晒管理團隊，有認股權證當賺咗

（資料圖片）

　　對於投資者嚟講，買SPAC股份有好大程度係押注落為SPAC提供初始啟動資金嘅創始人同管理團隊。一般散戶係買入Unit參與投資，每Unit由一股普通股同不定比例嘅認股權證組成，所以喺併購完成之後投資者唔止會得到由股價上漲（下跌）所得嘅收益（虧損），仲有機會得到認股權證嘅額外收益。不過名氣越大嘅贊助人，所提供嘅認股權證比例越細，甚至不會提供，例如電盈（00002）主席李澤楷同PayPal聯合創始人Peter Thiel共同成立嘅SPAC公司Bridgetown Holdings，就冇提供認股權證。

　　港交所近年致力打擊買殻，相信如果真係要推，限制應該唔少。依家業界人士嘅睇法都係好壞參半，港交所睇嚟要好好解答投資市場嘅疑問。

撰文：吳藹林