「Intern細路」令全世界中環人抬唔起頭……

　　貴為中環IFC一間跨國公司，年年都有唔少大學生申請入嚟做Intern。公司除咗睇申請者的學術背景同我哋公司係咪有關，同學面試時醒唔醒目、同我哋公司理念是否一致等等「行」嘢。我哋發現，原來公司收生暗暗仲有一個標準，而呢樣「隱秘的標準」竟然一次次咁打擊到我哋中環專業人士！

 

　　話說公司真係好願意培訓新人、玩死舊人。Internship過程中有機會，都會叫我哋帶埋Intern同學仔一齊出trip，當畀佢哋開下眼界，順便利誘下佢哋畢業後返嚟做「牛」。好啦，現今嘅大學生好多人都周遊列國過，搭飛機真係好閒啫，講到搭乜機去Terminal幾、應該早啲入禁區，因為個Gate要搭shuttle等等，阿姐我唔係出過幾次Trip有經驗，都真係唔夠佢哋熟……好彩！都仲招架得住！不過，飛機land完先見真章！一行人係行李輸送帶度等拎行李，呢個時候，Intern同學嘅行李竟然帶頭送到，但就遲遲都未見其他乘客嘅行李。

 

 

　　大家咁得閒，咪講笑咁講「會唔會係你有違禁品所以拎咗出嚟先啊？」

 

　　「哦！可能因為我個喼冇摵牌，一路掛住之前坐Business個Tag，咁佢哋見到個牌，咪以為我今次都係Business Class，所以處理咗先！」

 

　　「咁都得架乜？」

 

　　「我都係第一次掛住Business牌搭Econ，估架咋！點都好，下次搭完Business記得唔好摵走個牌啊！」

 

　　言下之意，睇嚟Intern同學仔次次都係坐Business，冇坐過Econ喎。仲好心到提醒大家下次撘Business唔好搣走個牌！唉，唔通我哋呢班成年中環精英未搭過Business又話你聽咩？不過嗰刻，「我哋真的輸了。」

 

 

　　又有一次，同事A去旅行，諗住一人寄張Postcard當手信唔使煩，咪問大家拎哋址囉。拎完哋址正常都會八下大家住邊，點知唔係好睇得明Intern同學啲哋址！點解睇唔明？因為平時住開屋邨或者屋苑都會個pattern：室、樓層、大廈、屋邨/屋苑，但同學仔嘅哋址只係話街號、地區，就完了！一方面擔心同學仔寫漏地址，一方面其實自己好奇，咪上網Check下囉！最後就查出原來同學係住嘅係一幢幢嘅House，唔怪得淨係要街號都夠啦，因為屋企夠大嘛！喺嗰刻我哋靜咗，只怪自己見識太少，唔識得獨立屋哋址係乜玩法。而另外幾個Intern之中，我哋淨係識睇一個哋址「Taikoo Shing」……

 

　　呢刻我哋知道，公司請Intern原來仲睇埋家底！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇