老闆畀錢考車，點止要你做司機咁簡單

　　秘書呢個職業，話就話好辛苦，差唔多24小時隨時standby（而家仲邊有純辦工秘書架？個個都公器私用，要秘書做埋私人助理架啦！），但見嘅世面同得到老闆嘅寵幸就一定比普通打工仔多！一樣係喺中環返工，有一位任職秘書嘅朋友，每次見面都覺得佢十分上進同幸運！點解？因為每次見面，都會突然考咗啲「乜牌物牌」，仲要老闆全數資助，變咗全能員工，真係隨時轉工都冇難度！不過，朋友就同我講呢啲牌，唔係你想像中咁簡單！ 

　　例如一次，老闆要佢考車牌。朋友心諗：「梗係又想我做埋司機車出車入啦！」，之但係老闆開到聲，又畀佢用辦公時間去學，仲要包找數，又真係睇唔到理由拒絕嘅。最終朋友考完車牌，開口中做埋司機！算！但新牌仔落地就畀架靚車你揸，有起事上嚟真係寧願搵個身去擋，都唔敢刮花一條痕，壓力大到爆炸。 

　　但畀得錢你考車牌，又點止要你喺香港揸車咁簡單呢？有次老闆仲邀請我朋友一齊去旅行添。風流波士俏秘書？咁正？不過我朋友都冇心情FF咁多，當日帶住上戰場嘅心情去到機場，見到老闆一家大細⋯…都知道老闆冇咁好死，一睇就知老闆其實係想朋友車佢哋一家人去玩。雖然嗰幾日住喺啲連燈都唔識熄嘅豪華別墅、食啲唔使睇餐牌有人幫你發板嘅美食，的確係人生中珍貴嘅經驗。但突然間要朋友由揸右軚變做揸左軚，仲要全車滿員，真係諗返起都一額汗。或者有人話，點解個老闆唔喺當地請個司機呢？因為我朋友已經知道晒老闆脾性，仲可以間唔中講下公事，咁仲點解要搵個乜都唔清楚嘅司機呢？ 

　　車牌除咗揸車仲有乜作用？真係諗都諗唔到，原來老闆睇中咗佢啲分！其實佢老闆份人又唔係真係下下要司機車出車入嘅，有時都想揸下「大牛」出去威下。你知啦，「牛」呢啲車，揸得慢就唔型架啦，唔通係紅綠燈前急剎車乜？衝燈、影快相罰錢真係閒事，揸得跑車，罰款使費同入油一樣係必需嘅。但扣分就唔同講法，扣下扣下，車都冇得你揸，仲要時間上駕駛改進課程？所以朋友老闆當畀少少錢，買朋友果十幾分返嚟。有乜事扣晒啲分？咪恩准佢辦公時間出去上堂再考過囉。引用返朋友果句「你以為你成功佔到老闆便宜？其實老闆做嘅嘢一切都盡在佢掌握之中咋」。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情