【好心無好報】借嘢畀同事 整爛之餘仲被唱？

　　出來社會做嘢，相信好多人都話過最好與同事保持距離，唔好太Friend！但有時同事有難要幫助，你又咁啱幫到手，相信你都會願意伸出援手，當搞好同事關係，順便種個恩德。不過，世界上衰人、怪人真係好多，正所謂「好人難做」，有時你幫完人，得到嘅反而係自己受罪！ 

 

　　記得當年iPhone 7啱啱開賣時，有幾多「果迷」日日捕住下晝3、4點，等個ireserve一開就搶機，如果10分鐘內load唔到，你都必輸無疑。果迷搶唔到，公司Product team同事一樣都搶唔到。話就話Apple公開晒ios嘅功能，公司一班programmer可以照住公開嘅資料去upgrade隻app。但冇機喺手，寫完隻app冇得試，就畀要「快」、要「威」嘅管理層迫推出街，有啲乜事衰咗又要揹黑鍋，IT部真係如同地獄中求生一樣。不過，身邊總有人唔知係咪上世拯救咗世界，做乜都特別好運，今次亦唔例外，畀佢買到新iPhone！當IT部同事見到Kitty拎住新機落地唔夠一星期嘅iPhone 7……

 

 

　　「嘩，Kitty！你咁犀利買到新機？」

 

　　「係啊，我都係捕住ireserve咋，竟然好順利喎。」

 

　　「咁神奇？我哋成班Product Team一齊捕住都買唔到啊……」

 

　　「哈哈，唔緊要啦，過多排冇咁多人買先囉！」

 

　　「唉～唔等得啦！上面要我哋update公司隻app，冇部電話喺手做testing，有乜事真係成條Team人頭落地啊！」

 

　　「吓……咁都得？想迫死你地咋喎……」

 

　　「係啊……不如你賣部電話畀公司，佢畀返錢你，遲啲少人啲時買過部新機啊？」

 

　　「吓？我唔想重新Download過啲App喎！你地試嘢要幾耐啊？不如我借畀你哋一陣啦。」

 

 

　　Kitty唔知係好心，定係唔好意思拒絕人，就將自己部電話「暫借」咗畀Product Team！個半鐘過去，電話終於回歸！滿Mon手指紋之下，Kitty發現了一道花痕！而新電話入面，本應只有幾個必需的App，卻突然多咗十個簡體字、唔知乜國家嘅App！雖然Apple冇咁容易中毒，但個Mon花咗點計先？

 

　　「吓？頭先已經有呢條痕啦喎！我哋冇做過咩，都係Download啲App咋，Del晒佢就得架啦！你想要新機嘅，一係我幫你入紙買咗你部機畀公司，咁你咪可以買過部新囉！」

 

　　好明顯，Kitty信錯人，佢亦選擇賣畀公司。人哋好心借野畀你，救你一命，你整花咗仲要唔認數？而且同事講到係Kitty貪新，而家畀個機會佢用公司錢去換新機。其實，你估人哋想煩咁多嘢去換部新機乜？咪因為你哋整花咗人哋部機囉！所以話，有時真係唔使做好人，亦唔好FF咁多好心有好報！辦公室有好多人，都係知恩唔識圖報架！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇