【官仔骨骨】中環人最要面！

　　記得細個有同學同我講過：「我呢世女一定要係中環IFC返一次工！」無錯，中環白領的確畀咗人好多幻想，以為個個身光頸靚，一定賺好多錢，係社會棟樑？其實好多九龍工廈嘅人賺錢分分鐘多過中環人。不過，我就好同意中環人衣著一定係全港最專業最formal！因為一切都關面子事！而今次呢位男同事，就敗係「面子」身上！

 

 

　　今次主角「要面男」叫做Nathan，表面睇著起套suit正正常常，似個事業有成的中環精英，但平時同事都知佢性格「唔大得」，因為佢要面得嚟又好幼稚，一定會同你鬥到贏為止。一次食完Team Dinner，成班人散band之際，講起21歲仔唔見勞力士單新聞，有人羨慕，有人葡萄。突然有人提議行下錶行，咁就出事啦。

 

　　 「Nathan！不如你都買返隻襯下你套suit啦！」同事講笑。

 

　　「喂！你唔好引佢啦！」女同事怕忍出禍做和事佬。

 

　　「唓，錶咋嘛，睇下囉！」

 

 

　　之後，Sales姐姐就拎咗隻10萬嘅勞力士比佢試，而Nathan又真係試到好似想買咁。大家見狀當然怕Nathan衝動買咗，紛紛幫口踩下隻錶、拒絕下sales。就係我哋幫口拒絕之時，有個睇落成個樓下街邊阿伯，衣著爛撻撻的阿叔，唔使10分鐘已經買咗隻40幾萬嘅Piaget。唔識錶嘅我當然將注意力放哂係神秘富豪伯伯身上，同時，sales姐姐眼見隔離同事成功開單，退而求其次講咗句：「一係考慮下呢款啊，8萬幾，10萬都唔洗，初階者最多人玩呢隻！」

 

　　「咩初階者？你唔拎多幾款畀我睇我點考慮？」

 

　　Nathan一句說話擊敗我哋成班！因為我哋知道，Nathan一定又搭沉船買咗隻錶！結果，Nathan買咗第一隻試戴嘅「勞」。返屋企時，我問Nathan點解咁衝動買隻成10幾萬嘅錶，佢話：

 

　　「你哋成班陪我睇錶喎！點可以空手而回？仲有啊！連個阿伯都買隻40幾萬嘅錶，我哋呢啲著晒西裝，反而空手出返去咪好無面？你頭先睇唔睇到個Sales個口面啊？好似睇唔起我哋咁啊！我就要證明畀佢睇我哋係有錢買嘅！」

 

　　其實……我哋唔係陪佢睇錶，我哋只係食完飯亂行咋！真係多謝晒佢咁為我哋諗，為咗大家嘅面子洗十幾萬！同埋我真係睇唔到Sales姐姐個口面啊，我掛住望住富豪伯伯咋！不過，我相信個姐姐都好感激Nathan嘅……但我諗佢呢幾個月，都要捱麵包喇！所以，有時真係要學識放低「面子」！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】《施政報告》提出醫療改革，盧寵茂表示日後普通科門診擬只接受弱勢群體，你是否支持？► 立即投票