2021-11-23Photo: 圖片由作者提供

66無窮招客又趕客

　　上周，老友Zip非常有心，將我「粉絲頁」（Fanpage）的最新數目影低電傳。

　　有乜咁特別？正因這個頁，追踪數量已迫近七萬六，而Like的數目，非常有趣，正是「66666」，六六無窮也。

「Luke Sir 曾智華」的最新「like」及「追縱」數字。

　　我的fanpage「Luke Sir曾智華」，成立於2018年底。當時，Zip拉小弟講：「碌Sir，你電台及報章追隨者不少，為乜唔開個人專用社交平台，日日發放想講的訊息？」

　　起初，耍手擰頭，因我乃科技盲。兼且，唔想再孭任何責任，只希望享受閒雲野鶴自由自在人生。更重要，久不久上其他社交平台（機構或個人），但覺非常煩厭。因留言版內充滿燥火及憎人富貴厭人貧的Haters。更甚，因可以隱藏身份，留言者不少粗口爛舌，誹謗侮辱，看後真的要洗眼！當然，更多是「職業回應者」，收錢散佈意識形態。

　　「冇問題㗎碌Sir，個平台屬你的，可以自訂遊戲規則。唔想收，一律鎖戶可也！」Zip 解釋：「不過，當然包容度愈大愈多粉絲啦！」

　　見佢誠意拳拳提出「義助」。好，又玩吓！

　　結果， fanpage 2018年11月面世。老友菲力仔當時大唱反調：「你咁喜歡評論政治時事，又唔俾人講粗口，邊會有like㗎？唔信你睇吓其他KOL啲網頁吖，傻佬！」

　　講時為三年前。但佢有佢講，我有我堅持自己的house rule：一、不准粗言穢語；二、不准誹謗詆毁別人，尤其用昆蟲動物「踩人」，包括曱甴及狗；三、不歡迎事事負能量的Haters；四、凡見五毛打手即鎖；五、不歡迎任何商業行為。