救牙一命、勝造……

　　古語有云：救人一命勝造七級浮屠。真係救得一個得一個。

 

　　咁，人的身體器官又如何？有醫德的醫生老友曾對我講：「碌sir，同理，救得一個得一個。由眼耳口鼻身體四肢到體內器官，救得的，一律救。因割去之後，從此冇咗！」

 

　　牙齒也一樣。拔掉後，得返個窿，只能鑲假牙填住，以免有礙觀瞻。

 

　　小弟下鍔前牌有隻牙，十年開始鬆，不知原因。一鬆就弊，唔敢咬嘢，怕大力一咬，即甩，故吓吓就住就住，連飲食樂趣也大減。

 

每隻牙都有生命，切勿輕言放棄。

 

　　因屬長俸公務員，我每年到政府診所洗一次牙。次次都會向醫生報告：「前面隻牙鬆鬆地。」例牌都回應「唔」一聲，安排到隔離房照X光，然後話冇乜事，打發走。

 

　　冇事？當然唔係！

 

　　不過，醫生一如所有專業範疇工作者，有高手有低手，有高道德有普通Hea，有睇餸食飯（政府醫生尤甚，因資源緊絀，每日見大量病人，全部有時間指標！），有彈性大一點。

 

　　我算唔好彩，十年以來遇到的政府牙醫，全部屬「行貨」醫生，絕冇一位解釋我聽，原來可以「救牙一命」的。

 

　　直至三個月前，鬆動牙齒底部發炎。痛之外，牙齒搖動更甚。遂速速搵老友介紹高手又有醫德的牙醫（唔等於會斬你一頸血！）。

 

　　終於，就體驗到「救牙一命」的「恩典」。

 

身體四肢及內臟，不會重生。有醫德的醫生，必會盡力協助病人作出保存，回復健康。

 

　　醫生首先照X光，然後講：「曾先生，你的牙鬆，因長年輕微發炎，影響牙根。但隻牙並無死，所以，理論上可以救得返㗎 ！」

 

照X光可以清楚知道每隻牙的狀況及問題。

 

　　「吓？但佢已郁得好犀利，我已多年唔敢用佢咬嘢啦！點可以重生呀？」

 

　　「X光顯示，佢隔離隻牙，仍健康穩固。咁就易。先替你隻問題牙作深層次牙根消毒。然後，用微型鐵線，將問題與健康牙連結在一起，以便借力。徹底清潔後，牙肉會消腫生實。如此，問題牙在健康牙扶持下，就有機會再慢慢自己企穩㗎啦！」

 

牙肉一旦發炎，必須立即見醫生，以免影響牙齒的健康。

 

　　點解呢個聽落簡單知識，十年來，一個政府醫生都冇向我講？更遑論，提議做？搞到小弟幾乎冇咗一條「牙命」？真係MM咁嘅聲！

 

一副美麗而整齊的牙齒，是上天的恩賜，必須好好珍惜及愛護。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票