【見識≠識見】別太無知！去旅行不為在Google Map標註多幾粒星星

　　咩叫常識？

 

　　有啲人覺得常識即係見識。去過澳洲、非洲、南美洲算唔算有見識？坐過飛機頭等倉、喺101樓rooftop食過teppanyaki，又算唔算有見識？「真係見過」Steve Jobs本人又算唔算見多識廣？一個人可以去過好多地方、見過好多奇珍異獸，但佢哋嘅「識見」未必一定同佢哋眼睛所見成正比。

 

　　用金錢去一個新地方、做一樣新事物，其中一個目的，就係買一個機會去刺激自己嘅五官，畀一個全新感覺自己。五官刺激過後，領悟到幾多就全靠自己之後嘅思考同內化。將「見識」變為「識見」，比起就咁用口講畀人知你去過邊度、見過啲咩，更令人信服。去旅行並非只為喺Google Map上mark多幾粒星星，然後喺人哋面前炫耀。

 

 

　　有啲人覺得常識即係通識。你上一次睇晒一本書係幾時？你上一次睇晒一份報紙又係幾時？平時搭車，你會選擇打機，定係睇新聞？我有個中學同學叫Gilbert，佢讀書時成日都問：「讀通識其實有咩用？睇新聞其實有咩用？」、「南北韓統一其實關我咩事？」、「嗰科《電影、社工與人生》點解要迫我睇《發條橙》呢套戲？」

 

　　直至半年前，Gilbert開始明白通識究竟對工作有咩實際幫助。Gilbert工作嘅外資品牌喺中國大陸設有分公司。上兩個月佢發現公司嘅簡體中文網站，喺國家一欄將香港、台灣同時同其他國家一併列出。由於Gilbert之前睇過相關新聞，所以佢立即向上司匯報並處理，總算為公司「防患於未然」。

 

　　唔可以將你變成專家，但往往可以避免你喺別人面前顯得太無知，同時有可能令你避過一啲麻煩。所以，請唔好阻止自己吸收知識，就算係其他行業嘅知識、世界大事、娛樂新聞等，因為你永遠唔會知幾時用得著呢一啲「小知識」。

 

　　講咗咁耐，咩叫常識？

 

　　我會話常識就係見識加通識，再加你自己嘅知識同分析，從日常生活中trial and error、從別人身上學習、從錯誤中吸取教訓。所以常識其實一啲都唔簡單，common sense其實一啲都唔common。

 

　　現今，好多人只顧盡快完成工作、交數畀上司就搬字過紙，完全無經歷思考過程，無嘗試運用自己嘅常識就草草了事。

 

　　「微信嘅讀者群係中國大陸，點解要做埋英文版本？」

 

　　「啊，因為上年都係咁做，所以我都照跟啫。」

 

　　「呢個QR code喺張slide上面咁細，其實啲觀眾會唔會scan唔到？

 

　　「啊，我又無諗過呢個問題，我諗住擺咗落去就ok。」

 

　　所以，如果你發現身邊有一位幾有常識嘅朋友或同事，請你務必要多加珍惜。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好