【職場上位之道】如何獲得老細垂青？首先你要能製造「新價值」

　　職場上有兩類員工經常會得到老細嘅垂青，如果老細interview時遇到佢哋，都唔會介意畀多少少錢請佢哋，因為佢哋嘅特質所帶來嘅利潤，遠遠高於果幾千蚊。

即刻上手嘅員工

　　公司好多時會用較多資源去幫一位新同事「上手」，不論新同事經驗有幾豐富，要短時間內適應各部門運作及其他員工嘅工作模式，其實係有少少難。尤其係職位低、年資短嘅員工，適應能力相對亦較低。平均計，員工需要最少三、四日先開始正式上軌道，但還未稱得上好有工作效率。所以一啲適應力較佳嘅新人，如果佢哋可以一返工就能「自動波」工作嘅話，貴少少都係值得。再者，佢哋亦好合適去處理一啲較急、變化較大嘅工作，佢哋嘅柔韌性同靈活性就係難以取代嘅獨特之處。

製造「新價值」嘅員工 

　　老細作為一位生意人，做所有事情都係講「價值」二字，「呢單生意價值何在？能夠為公司賺幾錢／商機？」、「呢個同事人工幾多？能夠幫公司生產到幾多『新價值』？」 等。而同事對公司嘅「價值」有時唔一定等於「金錢」，可以係一啲無形嘅事情，但有形無形都好，價值嘅終點九成九都指向金錢。每個同事本身都有自己嘅價值，而「新價值」意思指，喺公司期望之外，同事能夠帶到乜嘢額外嘅事情畀公司。而老細大多會分其為內在價值、外在價值。

　　有啲同事除咗喺working hour果 8個鐘內「交足功課」之外，佢哋亦有方法為公司內部運作創造「新價值」，呢啲就係內在價值。例如呢位同事能夠令自己／每一位同事發揮出兩個人嘅生產力，又或者該同事係一位「thinker」，能為公司想出減低營運成本嘅方法等。而外在價值，就一定係指生意，同事能夠幫公司作為開荒牛拓展新業務，為公司帶來即時嘅新生意，亦可能係一啲「無形」嘅營利能力。例如，因該同事嘅名聲，令公司喺市場上多咗人認識／認同，從而帶來新賺利。所以有啲公司會願意免費送股份畀明星／知名人士，令其成為公司一份子，用股份「買」佢哋嘅知名度回來，換取更大回報。

　　如果你有以上才能，見工時你可以大膽推高少少你嘅期望薪酬，相信老細一定唔會因為幾千蚊同你斤斤計較。良禽擇木，如果因為少少錢而失去一位好同事，又或者同事上班後因為人工問題而辭職另覓新主，到頭來浪費金錢時間，都係老細自己。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】美國總統大選在即，你認為誰將最終當選？► 立即投票