《Online有話兒》Facebook死機世界靜了，朱克柏格一日唔見60億美金！

　　昨晚（4日）可能係世界上最寧靜嘅一晚，因為Facebook、Instagram同Whatsapp係同一時間死晒機，大家應該會打返開部電視睇下，上下連登一齊慰問對方，甚至早小小瞓啦！不過，係美國呢一邊，Facebook因為呢次死機事件，股價無咗近半成之餘，創辦人朱克柏格份身家一日更蒸發咗60億，係咪同近期「水逆」有關呢？　

 

 

「李香琴式」呼喊，Facebook仍未交代原因

 

呢次連登先係最大贏家？（連登網站截圖）

 

　　唔知大家噚晚有無好似李香琴咁呼叫「世界末日啦！」呢？不過一眾連登仔都上網開Post，詢問其他「巴絲」係咪都有斷網情況，並表示連登可能係地球上唯一一處「樂土」，因為三大平台死晒機，連登都依然「朝氣勃勃」。

 

　　三大平台大約係晚上近12點開始死機，直至今日早上5至6點左右先正式恢復運作，雖然Facebook發表聲明表示向「全球仰賴我們的人及企業」道歉，但就無交代當中原因，而有專家及多個媒體估計，呢次故障好大機會係由於DNS (Domain Name Server) 出現問題，由於人為設定錯誤，導致網絡無法識認到facebook 伺服器，相信受到黑客入侵可能性會較低。

 

Facebook Messenger：可能同「水逆」有關

 

（網上截圖）

 

　　平台死機，呢次最大贏家可能就係Twitter同Telegram，因為得佢地可以正常運作，而Facebook Messenger更係Twitter平台上表示，「因為水星逆行關係，目前我們正在努力盡快解決問題。」死機又關「水逆」事？其實都係搞下笑，全球大癱瘓必然惹起用戶不滿，所以一個好嘅公關團隊可以化解危機，Messenger拎「水逆」做「廣告」又唔知你賣唔賣帳呢？

（網上截圖）

 

　　另一方面，對家Twitter梗係抽下水，自從三大平台出事之後，Twitter官方只係向平台講一句:「hello literally everyone」呢幾隻字，都已經獲得290萬讚好，已經11.32萬留言，連對家都要用Twitter平台先可以發表資訊，真係拎晒彩囉呢次！

 

朱克柏格身家縮水60億美元

 

　　其實Facebook死機都唔係第一次發生，通常都係小範圍或者短時間就會修復，不過最大範圍一次死機可能要數返2008年，因為當時一個bug令到Facebook死機死足一日，影響用戶高達8000萬，當時Facebook用戶都係得1億；不過截至今年第二季，Facebook主App的月用戶和日活用戶數分別有29億和19.1億，影響人口真係億億聲。

 

　　由於Facebook死機剛好係美股開市時段，當使Facebook股價一度大跌6%，收跌約4.9%，創下逾4個月低位，短短呢幾個鐘，創辦人朱克柏格身家就蒸發超過60億美元，彭博全球富豪榜上面，佢嘅身家就下跌一位，被比爾．蓋茨返超前。

 

　　如果你係朱克柏格，發現有個員工入錯代碼而出現呢次大事故，唔知你會唔會炒佢魷魚呢？

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好