《Online有話兒》「連登契媽」沽售特斯拉股份，並指係「策略性操作」？

　　港股日日跌，負面消息日日出，無咩事都係睇返美股開心啲。不過有「連登契媽」之稱嘅薩琳‧伍德（Cathie Wood）旗下Ark基金開始連環賣出特斯拉（Tesla Inc.），佢更表示呢一種係「策略性操作」，仲預計未來將會出現經濟通縮情況，咁得人驚？

 

 

 (Shutterstock圖片)

 

契媽一出手，便知有沒有

 

 

  (Shutterstock圖片)

 

　　「契媽」作為科技產品嘅大好友，早一排唔係唱好特斯拉就係比特幣，連中概科技股都照買可也，連登仔不禁高呼：「佢係咪癡咗線啊？」不過而家好似知驚咁款，中概股盡沽之後，近來開始連特斯拉股份都開始出貨，旗下方舟投資（ARK Investment Management）最近減碼18萬股特斯拉，契媽就話呢個係「策略性操作」，你話係咪係囉！

 

　　不過，契媽同樣對經濟都做小小預測，認為近來通脹數據大增，主要都係因為經濟重啟導致供應鏈緊張，但長遠而言物價都會下跌，當經濟完全重啟之後，就會開始進入通縮的世界。呢一番言論屬真屬假就需要放長雙眼，但特斯拉股價未有受契媽出貨消息影響，隔晚仲升1.52%，報755.83美元！

 

有人遲官歸故里，有人漏夜買Tesla！

 

　　有人唱淡就自然有人睇好，好似美國億萬富豪、巴倫資產的創辦人羅恩‧巴倫（Ron Baron）就係2016年做出預測，認為特斯拉將成為世界上最有價值公司之一，並且旗下公司持有最多嘅股份就係特斯拉，佔特斯拉總股本約1%。

 

　　巴倫呢一次豪賭，隨住特斯拉股價水漲船高，為佢帶來約40億美元利潤，而巴倫更認為，呢個只係一個開始，未來10年投資特斯拉嘅利潤可能會增至3倍；佢更大膽預測創辦人馬斯克另外一間公司Space X都會有類似成功，因為巴倫認為特斯拉有種特質係執著於舊觀念嘅行業中嘗試新事物，並專注於降低成本。

 

　　所謂「有人遲官歸故里，有人漏夜買Tesla」就係咁解。

 

Tesla有幾勁？Model S Plaid嘅0-100km只需2.1秒！

 

 

  (Shutterstock圖片)

 

　　玩開Tesla都知道佢樂趣，除咗因為佢係電動車可以節省能源之外，仲有電車特性就係扭力超強，一下「地板油」飛出去，其他車真係望住你車尾燈走。而有「最強特斯拉」嘅Model S Plaid係上市前跑一轉德國紐柏林北賽道，號稱有千匹馬力嘅猛獸，以7分35.579秒的單圈紀錄、並以最高極速達279km/h嘅成績，拎到「紐柏林最快電動車」稱號，更打破保時捷Taycan Turbo嘅紀錄！

　　呢部Model S Plaid宣稱有1020匹馬力，最高時速可達322km/h，續航力還可達628公里，市場預計呢部車售價可能大約120萬港紙左右，電車做跑車又有呢個性價比，確實又幾唔錯，睇怕「電動車」拉力比賽可能不是夢！

 

撰文:李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情