老婆大人廚技大躍進

#退休 #理財 #菲傭 #煮飯 #家庭 #夫妻關係

　　退休，加上仔大女大，再加上疫情限聚令，等於乜？等於有大量空間時間，正如某人名句——All I have in this world is TIME！

退休者擁有最多的是自由時間，可以善用，可以浪費，睇人。

　　更碰啱菲傭姐姐莎莉放大假返鄉，今次強制兩地隔離，大件事，最少離家三個月！

今天外傭回鄕渡假，連兩地隔離，僱主要「痛苦」近三個月。

　　三個月，邊個洗衫抹屋買餸煮飯……？當然係……老婆大人啦。因佢對整潔要求極高。假若由為夫做，必被罵「食嘢唔做嘢，做嘢打爛嘢！」老虎乸省完之後，佢又再做多次，盞搞。

我做家務雞手鴨腳，做乜都俾老虎乸省，因要佢再做一次。

　　咁咁咁，點呢？分工囉。我的第一份「工」，是冧佢氹佢安撫佢情緒。中午帶佢歎茶煑少一餐。然後，四出搜羅最好的外賣，包括油雞滷味潮州鵝，全部現成，即買即食，慳功夫。

　　菲傭離港已近一月，本來預咗慘情，結果……係，家中工作量大增，但出現三個良性現象：

　　一、小弟更了解區內各式美食所在，因幾乎日日買外賣。故此，那間食肆出品得，那間水餃雲吞標青，那檔潮州滷水有料到，不停有新發現，真係正！

限聚令加冇菲傭放大假，我立即變「外賣之星」。

　　二、晚餐食材質素大幅提高。眾所周知，蠱惑街市佬最愛呃菲傭，因佢哋來自窮鄉僻壤，根本冇優質豬牛肉及海鮮。所以，尤其肉檔，多以當日最劣質的貨色呃菲傭，小弟周不時食到火都滾。如今，好嘞，所有肉類蔬菜老婆大人親自出馬，海鮮則我自己選購（昨晚才歎咗條野生杉斑，正到飛起！）。結果，晚晚開餐時就是全日最快樂時光，有口福也。

　　三、老婆廚技大躍進。正所謂工多藝熟，任何事，起初難，但日日做，只要用心，必定進步。呢呢呢，為夫就見證老婆大人廚技，一個月內，不停進步。由「也也嗚」到普普通通。再由普普通通到有點料到。再由有點料到出現強項！小丈夫我立時封佢為家中廚神。總之，晚晚老婆大人出品我就掃清，一碟不留，汁都撈埋，以示欣賞！（冧到佢失暈）。