【不做廢上司】怕管理能力不足唔敢升職？先認請自己是Generalist還是Specialist！

　　好多人升職後都會有一種無力感，害怕為人上司後可能會力有不逮，亦怕自己管理能力不足，唔能夠服眾，反而俾班下屬「玩番轉頭」。最後步前人後塵，成為同事口中嘅「廢上司」。

　　日前朋友Ray問及前途問題，而家佢喺一間中小企做assistant manager，管理兩位junior同事。老細見Ray「夠年資」所以提出咗兩個升職嘅選擇，一係轉去另一個新部門並升職做manager，專責處理一啲特別技能嘅工作。雖然升咗做manager，但佢唔會有下屬，部門所有人都係各自工作。而另一個offer留喺該部門工作，升做manager，之後會有四位下屬，但工作內容冇變。兩個選擇各有利弊，最後Ray同好多打工仔一樣，笑笑口回答老闆一句「可唔可以唔升職，但加人工」。

　　「天生我才必有用」係一句好啱嘅說話，但說易做難，事實並非好多人知道自己點先叫「有用」。大多工作都以勞力換取金錢同進職機會，而當去到某個階段，好多人都會情願「唔使升職」。問題係因為佢哋覺得愈高級，就算下屬多咗，自己嘅勞力都只會有增無減。其實好多senior級員工都有一個通病，就係未能分清自己屬於「Generalist」定「Specialist」，從而令自己長線愈做愈辛苦。

　　其實所有公司都會有著 Generalist同Specialist嘅員工，只係香港公司管理層好少會注視同合適運用呢一點。作為一個Generalist，你未必各方面嘅工作能力都十分超班，亦唔需要對所有事情細節十分了解，而最重要係你要有強勁管理能力，能夠令五個同事產出八個同事嘅工作量，將強嘅同事變得更強，係一位能夠輕易打造「拔尖隊」嘅隊長。而作為「Specialist」，你嘅管理能力可能比人弱，亦未必可以令同事變成「一加一等於三」，但你能夠做到其他同事做唔到嘅事情，喺特別嘅情況下做到決定。情況就好似一隊明星球隊咁，個個都好打得，但亦要有一位好領隊，隊員同領隊各自有自己嘅價值。

　　職場上，如果能夠愈早了解自己係Generalist定Specialist、係拔尖球員定高班領隊，往往對你長線發展有著重大嘅影響，令你行少好多冤枉路。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇