【管理哲學】留住好員工，由歸屬感開始！Google的超大休憩空間，代表着對員工的包容與信任

　　打工仔工作永遠只得三個原因，金錢、開心、前途，分別只在於呢三個原因嘅比重多與少。人愈大，睇錢愈緊，開心同前途相對地無咁重要。而年輕嘅一輩則剛剛相反，錢係重要，但佢哋更重視長線嘅前途。不過當好員工離開時，好多時都未必係以上三個問題，主因反而係因為「歸屬感」。

　　歸屬感係一個好虛嘅事，同事與公司間互相嘅感覺，一種化學反應。見過有公司老細為咗拉近自己同員工嘅距離，加強對公司嘅歸屬感，老細喺公司多個地方貼上「CEO語錄」，例如「Think big, do bigger」、「爱你的員工，他會百倍地愛你的企业」等等，希望製造一個親民嘅感覺。亦有HR會學習Google或Facebook，提供免費小食、舒適嘅豆袋、休憩空間等，令大家有一個更舒適嘅工作環境，從而更熱愛工作。但可惜結果係，冇一個高層更愛員工，亦冇一個同事會因為豆袋而熱愛加班。

　　其實公司嘅歸屬感係一種文化，而文化需要慢慢建立，最重要係，當同事真正感受到該文化嘅時候，所作出嘅反應會繼而互相影響其他同事，甚至係朋友、家人、大眾。

　　不同行業、不同公司、不同檔次，都影響公司文化方針嘅取向，公司如何建立自己獨有文化，留待日後長談。但如果要建立一個好嘅公司文化、加強歸屬感，除咗要問員工「需要甚麼」，仲要問自己「接受甚麼」。企業會先對文化方針取得定位，之後第一步並唔係提供免費小食同豆袋，而係要定立給予員工彈性嘅多少，了解自己嘅容忍程度有幾高。如果唔係，7:30pm後先可以享用嘅乒乓波枱只會形同虛設，限量供應嘅小食亦會令人眼冤。

　　豆袋、小食，只係一種文化嘅標籤，令大眾更易聯想到「Facebook office =免費小食 」，更甚至係「有免費小食嘅office = Facebook」，最後更變成office品牌嘅一種。不論Facebook嘅小食部、Google嘅超大休憩空間等等，除咗幫助同事思考，亦係包容嘅一種表達方式。你可以盡情玩盡情hea，因為公司相信大家，當建立咗呢種互信嘅精神後，同時亦代表住員工係真心為公司做事。

　　從來要建立一種文化都係唔容易，而保持呢種好嘅公司文化更難。不論一間公司，定一個國家，要建立一種好嘅文化同信任，先由包容開始。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票