【乞人憎】今日的我打倒昨日的我！老細頻施「彈弓手」毁管治威信

　　Patrick 係公司嘅二世祖，日日唔係遲到就係早退。奈何佢始終係公司老細之一，好多公司決策都要由佢決定。

　　Patrick 有一個花名叫「燈神」，因為佢喺公司做嘅大部分決定都係錯嘅，例如叫 marketing team 喺一個無 growth 嘅 region 繼續投放資源、炒咗兩個做得嘢嘅同事等等。

　　但每次面對因自己判斷錯誤而引發嘅惡果，Patrick都總係可以自圓其說，例如以「我哋睇長線，唔可以以一次結果嚟衡量」、「今次內幕消息唔係咁準」嚟打圓場，所以一班做得耐嘅下屬亦習慣為 Patrick 執手尾。 

　　Benson 係另一家公司嘅 Marketing Director，紅褲子出身，捱咗廿幾年先捱到今日呢個位置。由於佢喺好多大公司做過唔同職位，所以佢非常有自信，自覺經佢手嘅 project 都會非常成功。

　　但喺好多下屬心目中，Benson 並唔係一個好上司，因為佢經常「彈弓手」，即係經常推翻自己做過嘅決定。例如一星期前開完 team meeting ，佢親自拍板決定喺幾個平台落廣告，下屬之後就跟 order 做嘢，各自同所有 vendor 開會落實詳情。但一星期後，Benson 改變主意，推翻上星期決定，話「將所有 campaign hold 住先」，原因係 「budget 原來有啲 tight」。經過幾次類似經歷，一班下屬對 Benson 嘅指令都有所保留，抱住一個「睇定啲先做」嘅心態嚟保護自己。

　　Patrick 同 Benson 都屬於不受歡迎嘅老細，但如果要比較兩人作為管理層嘅能力，Benson 其實比 Patrick 做得更差，因為 Benson 擁有一種不確定性，令下屬無所適從，好多時更會浪費雙倍人力、物力，最終兩面不討好，仲衰過就咁作出一個錯嘅決定。

　　如果因為太自信而倉卒做出決定，但又因為形勢不容許而改變，一次都足以令你嘅管治威信毁於一旦，更何況係連環彈弓手？

　　作為一個組織嘅掌舵人，有責任審時度勢，衡量現實環境後先作出決定，唔可以因一時之氣、面子而堅持己見。不過當現今政府喺呢半年內都經常彈弓手，而主要官員又唔需要負上任何責任，仲可以繼續每個月出幾十萬人工，又難怪有啲公司管理層會有樣學樣。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇