【免費貼士】影響婚姻的家居風水陷阱

　　有朋友差點離婚，我介紹了個風水專家替她擺陣，救番！

 

　　當然唔係單單有得救，醫生都唔可以百分百醫好所有病人。除咗重金禮聘高手將家中佈局升呢至Home Sweet Home級數之外，大家可以參考吓免費貼士。

 

 

　　現在講吓D唔好做嘅嘢：

 

　　一、 家中，尤其是睡房中，不可放假花—即膠嘅、紙嘅、絲嘅、乾嘅全部格殺勿用。要插就插鮮花，喻婚姻有生氣、賞心悅目、活色生香，你想像吓有暗香盈䄂，或者翠䄂添香，幾咁高境界！

 

　　二、 買樓或租屋，不可選對住Lift嘅，因為部「車立」成日上上落落，動到飛起，會影響住客，小則令人唔想番屋企，成日在外蒲，重則有病，成日卧病在床，兩者對夫妻生活都冇好處，比較難造人。

 

　　三、 家中勿放有刺植物，如棘杜鵑、仙人掌等，因為有刺東西乃風水大忌，真係篤眼篤鼻，極為不利。

 

　　四、 同一原理，尖削物亦要避免，無謂畀D枱角、床角、櫃角射住，周身唔安寧，所以傢俬最好選圓角的，一來唔怕自己「坎」親，二來避免兒童受傷。現今樓宇如此迷你，好多人都訂造傢俬，可以將所有尖角削平。盡量啦！

 

　　五、 更重要的是：家中不宜有三角物體，三這數字在風水代表口角、紛爭、甚至訴訟。所以雖然法國羅浮宮嘅三角玻璃屋好有型，你千祈唔好照板煮碗，搬件三角形雕塑番屋企，真係唔衰攞嚟衰！

 

　　六、 揀樓亦忌鑽石型或三尖八角，除咗傢俬難擺之外。會令人情緒唔穩定、家庭唔和諧，住客容易發火、或者緊張、或者神經衰弱。你諗吓，有以上亢奮特徵嘅人在一屋之內，係咪會互相廝殺呢？

 

　　以上，眾多風水Pitfalls，會製造不好磁場，在夫妻關係中暗藏火藥，唔知幾時幾日，無lala爆炸。所以呢，要部署好屋企，無謂攞嚟死！

 

轉載自: 晴報

• 

第九屆「傳媒轉型大獎」請投etnet經濟通一票！ ► 立即行動