今生美醜 與前世有關？

　　本來叢林蒼翠、風和景明。

 

　　突然一少女衝入道觀，指住觀音像大罵：

 

　　「我阿媽一生篤信觀音，點解生得我咁醜？」

 

　　道長就問：

 

　　「係咪醜到冇朋友吖？」

 

　　「唔係，有好朋友。」

 

　　「係咪醜到冇人追吖？」

 

　　「唔係，有人追。不過我唔敢接受，我個樣咁衰，佢都唔知鍾意我乜？我驚佢玩我。」

 

　　道長講極都唔掂，惟有出「術」。

 

　　道長一接通天地線，即刻查吓佢D前生File。

 

　　哦！原來係一代名花，靚到震！但真係紅顏禍水，不停引起腥風血雨，掀起好多戰禍惡鬥，累死好多人。佢深感自己坎坷、愛人離散，皆因自己太靚惹禍，於是向天哭訴：

 

　　「點解？點解我咁慘？我下一世唔要靚，要醜。」

 

　　道長交代完以上劇情後，眾人都鬆一口氣，暗忖如果問題嘅源頭係少女自己，而且曾經靚過，已經有心理補償，可以減低今生憤怒，絕「蹺」！

 

　　不過少女半信半疑，開始懷疑道長老作。

 

　　道長二話不說，指住道觀一壁白牆：

 

　　「你睇！」

 

　　少女竟然睇見牆上現出不同片段，好似剪輯咗嘅Video，片中有一絕色女子，喜著藕色衣裙（呢隻色真係著死人，唔靚嘅著起嚟，面如土色，偏偏美人肌膚勝雪，益覺飄逸，亦益覺單薄。）在她生命中穿插著才子、將軍、土豪、軍閥，但都不得好死，片中還有不少烽煙戰禍場面，兵荒馬亂，真係觸目驚心。

 

　　原來道長用咗「圓光術」，將她前生剪影呈現眼前，不過衹有道長同女主角睇到。

 

　　「你現在明白啦，開竅未？」道長問。

 

　　「開咗！我今世會醒D，要掌握自己命運，一於儲錢去整容，再戰江湖。」

 

 

　　嘿！美女蛻變成烈女，真係不負今生青春，前生艷色！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇