見工騎呢人

　　由於四月桃花美女（詳情見上期）請我吃散水餅，我又開始請人、揀人及被揀的尋人之旅。

 

 

　　雖然請人乃日常工作一環，但這次因為同時招聘新舊不同職位，見了好些colorful人物，亦有D無厘頭騎呢人。

 

　　來應徵的人中，最常見的有幾個破綻。

 

　　第一是問非所答。

 

　　例如你問他在新媒體方面有甚麼經驗，他就從自己第一份工開始講，完全唔關新媒體事。原因有二：一是應徵者祇說他想說的，不在意你問甚麼。另一原因是他根本沒這方面的經驗，希望胡混過關。

 

　　來見工應注意這類specific question，不能祇畀個百搭答案，因為這正是戲肉所在，請與不請，就看你有冇對準試題答。

 

　　另一種僱主常出的是open-ended question，即讓你自由發揮的問題，例如問你最近有沒有從消費者角度留意廣告的新趨勢。這試題其實是給你表演的空間，讓僱主觀察到你對行業是否注意，有沒有敏銳觸角，對最新事物能否掌握等。不過好多人都答唔出，一係話一時諗唔到（即係平日冇做功課），一係就長篇大論、言不及義（又係帶你遊花園）。

 

　　除了對答之外，打扮也容易令你被out。

 

　　有位男士可能特愛朦朧之美，髪型甚為掩映，遮住一隻眼，於是一面答問題一面fing頭髮，攪得我眼花瞭亂，其實這髮型不一定出事，就算男士化妝都冇問題，但這出位髮型一定要配合輪廓、氣質，祇適合俊美小鮮肉，他當然不是，全程我祇可以與他單向溝通—即同佢隻單眼溝通！

 

　　有位女士則不祇出位，還出肉。她大概是我兩倍體積。一襲短裙鮮紅如血，還在前幅開了幾個洞，露出雪白五花腩，條裙又特短，連屁股都差不多冚唔到。

 

　　唉！俗。慘過土！

 

　　其實去見工，男士髪型宜清爽，而且要配合頭型，例如有位男士，頭已偏小，髮線又向後移，還兩邊剷青，於是個頭睇嚟仲細，仲尖，又兼佢日日去舉鐵，更顯頭小身大，完全唔襯，而且頭太小在相學而言，壓不住場，蝕底！

 

　　女士髪型則可以百花齊放，但整體形象一係就乾淨俐落，一係就時尚有型，切忌cheap和妖！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票