【靚女唔一定有靚名】怎樣的名字能有好姻緣？

　　靚女唔一定有靚名，此處所講嘅靚，係從姓名學嘅角度出發。

 

　　近年當選嘅港姐，不衹要艷壓群芳，亦要係出色嘅Achiever。

 

 

　　應屆冠軍馮盈盈乃港大畢業生，修讀食物及營養學系，肯定係本地尖子。佢嘅美麗事業，亦發展得早，中學已經天生麗質難自棄，兼職模特兒，經常以角色扮演於活動中曝光，因此畀網民棒為「港大校花」、「食營女神」，後來更喺「百變美人季」大中華總決賽及亞太區總決賽獨佔鰲頭。不過佢當選港姐後被人起底曾在網頁爆粗。

 

　　佢論學業、事業、名氣，的確收獲豐盈，但喺感情路上，可能有阻滯，相信爆粗機會會更多！

 

　　好意先生認為：盈盈呢個名，麻麻地！

 

　　點解？

 

　　「聯想唔好，你諗吓，多數講淚盈盈㗎嘛！」佢答。

 

　　「唔可以喜盈盈咩？」我拗。

 

　　「你話兩者邊個多人講吖？而且盈字下邊嘅皿字乃血字尾，有麻煩。亦主感情多波折，不過有呢個名嘅人，係叻女嚟嘅。」

 

 

　　講到叻女，上屆冠軍麥明詩個名又點呀？有個明字，有日有月，有陰有陽，夠平衡喇卦！不過間中有啲負面評語。

 

　　「我冇睇娛樂新聞，一概唔知。但以名論名，麥嘅諧音係墨，由墨至明，即由暗轉光，係咪有D轉折呢？仲有，詩字唔實淨，太虛浮飄渺，因此姻緣亦來來去去。」好意先生答。

 

　　「媒體久不久就傳佢可能同林作復合嘅消息，你點睇林作呢個名？林作最近又有攪作，暫時放棄大狀資格，飛身撲入補習天王行業。」我一於八到底。

 

　　「唔！兩個人嘅名唔配，冇可能復合。但我認為作字可當有作為、有名氣解，亦可當作嘢、攪嘢、作怪解。」

 

　　普遍而言，女人名字，宜避開D如煙如霧嘅字，皆因太不實在。詩字音好，但易浮。至於冰雪等，皆忌用，因太冷，在感情生活中難激起熱情，容易有緣無份。薇亦是傷心的字，難逃注定受傷的宿命。

 

　　女人嘅名，同做人一樣，切忌太虛淨，名字飄盪，愛情也飄盪。情路艱難，姻緣流散，是女人最痛！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇