《Online有話兒》有指耶倫將出任美國財長，佢有乜嘢咁把炮？

 　　美國大選終於可以叫做告一段落，因為密歇根州檢票委員會宣布，認證民主黨候選人拜登獲勝；另一邊廂，拜登呢一期密鑼緊鼓籌組班子，而最新消息係拜登搵嚟前聯儲局主席耶倫做下任財長，究竟耶倫有乜咁把炮呢？

 

拜登：我哋無時間浪費

 

（Shutterstock圖片）

 

　　拜登上任之後，要面對嘅任務真係接踵而來，除咗解決疫情之外，仲有就係點樣刺激經濟復甦，雖然而家美股都仲係高位，但係仍然好多人失業，而且企業都仲吊緊鹽水，所以係提名閣員聲明，佢就咁講：

 

　　「係國家安全同外交方面我哋已經無時間浪費，所以我哋需要一支團隊係上任第一日就做好準備，團隊係要團結全世界來迎接最大挑戰，去推進我哋嘅安全、繁榮及價值觀。」

 

　　拜登呢次「國家級任務」真係任重道遠，搞得唔好真係有機會畀特朗普反撲！

 

掌儲局橫誇兩屆總統任期

 

（Shutterstock圖片）

 

　　外電消息指，有傳拜登將計劃聯儲局前主席耶倫出任下一任財長，而現任聯儲局理事Lael Brainard及前聯儲局理事Roger Ferguson都同樣係熱門人選。

 

　　究竟耶倫有乜咁把炮呢？佢係2014年2月至2018年2月擔任聯儲局主席，橫跨奧巴馬及特朗普政府，所以對於兩黨財政政策風格都有一定程度了解，對於民主黨推出嘅財政法案，有機會可以同共和黨傾得埋；而耶倫雖然做主席只有4年，但佢係聯儲局已經工作14年，任內都係以鴿派風格為主，強調緩慢加息，事實亦證明呢一招令美國經濟可以持續復甦。

 

　　另外一點，就係耶倫畢竟係聯儲局做過，係未來調整利率或者QE（量化寬鬆），政府同聯儲局都可以有商量空間，睇得出拜登局棋都佈局唔錯！

 

市場反應正面，美股急升債價下跌

 

（Shutterstock圖片）

 

　　至於市場對於耶倫上任消息點睇呢？美股道指隔晚（23日）就高收327點，而美國10年期國債價格下跌，反映資金開始流出債市，而家10年期債孳息率升2.6點子報0.855厘；金價都開始回落，現貨金現報1830美元，跌6.75美元或0.37%。

 

　　似乎市場對於耶倫上任財長呢個消息都有正面回應，咁我哋拭目以待一下，假如耶倫上任之後會出啲咩招打救美國經濟啦！

 

撰文：李皆穎

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇