【童年回憶】四季豆豆乾櫻花蝦炒肉粒

 

　　記得童年時家中的家常菜會煮一味「叉燒炒粒粒」，材料有叉燒粒及豆角粒，用來撈飯一流，好開胃。因為以前一餐飯最多有一兩味餸已好好，唔使加鹹魚、腐乳已很幸福。

 

　　時至今日，炒粒粒的菜色都好少出現在我家飯桌上……點解？因為很少人喜歡炒粒粒，喜愛分開吃菜就係菜，肉就係肉。另一原因可能係買豆角的價錢有時還貴過一斤菜，試過我去買一札豆角，都無6兩，要廿幾蚊，唔好意思地問菜販幾錢斤，她說六拾幾蚊一斤，當時街市菜價最貴菜心都唔使廿蚊斤。豆角貴，唯有改吃其他菜色。

 

　　所以，今期就改用四季豆去做另一個變化菜色，加入豆乾及櫻花蝦及豬肉粒去炒，味道非常惹味可口，大家值得一試！

 

烹煮時間：10分鐘

份量：3-4人

 

材料：

 

 

　　四季豆     200 克

　　梅頭瘦肉  150 克

　　豆乾        1件

　　櫻花蝦     15 克

　　蒜頭        2粒（切片）

 

豬肉醃料：

　　生抽    2茶匙

　　生粉    1/2 茶匙

　　砂糖    1/4 茶匙

　　油       1/2 茶匙

　　鹽       1/4 茶匙

　　紹酒    1茶匙

 

調味料：

　　蠔油     1 湯匙

　　老抽     1茶匙

　　胡椒粉  少許

　　砂糖     1/4 茶匙

　　鹽        1/4 茶匙

　　紹興酒  1茶匙

　　清水     100毫升

 

　　生粉水：生粉  1/4 茶匙 +  清水 1茶匙（拌勻）

 

做法： 

 

　　1. 瘦肉沖洗切粒，加入醃料醃15分鐘。

 

 

　　2. 四季豆撕去筋，沖洗，切粗粒，放入滾水內煮5分鐘，盛起瀝乾。

 

 

　　3. 豆乾沖洗，切粒。

 

 

　　4. 燒熱鑊落少許油，爆香蒜片，下豬肉粒炒勻，加入四季豆、豆乾及調味料煮3分鐘。

 

 

　　5. 加入櫻花蝦煮2分鐘至汁液略收，最後加入適量生粉水收汁，即成。

 

小貼士：櫻花蝦可以改用蝦米或日本小蝦米。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇