獨裁者的可怕，在於沒有人可以制衡得了他／她，很多時，我們只能看著一個獨裁者作了足夠多的孽，但還有機會殺人放火金腰帶，只有部分或會被自己所製造出來的災難滅掉。

 

　　世上現今最著名、最受關注嘅獨裁者，就係北韓首領金正恩，佢總有方法保持自己喺國際媒體嘅曝光率，哪怕係射失飛彈、誇張閱兵、全民簇擁、用望遠鏡唔知睇咩。金正恩嘅最新搞作，就係威脅對美國開戰，揚言會令美軍喺太平洋嘅關島基地陷入火海，又指出會喺月中定出作戰方案。金正恩嘅對手，就係有成為獨裁者潛質嘅美國總統特朗普，究竟最後雙方會否開戰？周邊國家會否被捲入漩渦？一切都係未知之數。

 

　　獨裁者嘅身影喺國際間興風作浪，香港都出現一位教育界大獨裁者，無論身形、手法都有金正恩嘅影子……

 

　　屯門興德學校早前被爆出校長陳章萍管理手法有極大問題，管理教師團隊方面，曾經要求教師唔上堂，走去深圳派傳單招生；老師請病假要交6張餅卡，或邀交現金，據報道指陳章萍聲稱係要老師「慶祝自己病好」，亦都出現教師升遷準則不明、聘用有虐待學生案底人士成為校長助理等多種人事問題，令教師流失率極高，甚至傳出因陳章萍嘅高壓管治，而令教師患上抑鬱，企圖自殺。

 

　　此後，興德嘅管理問題愈揭愈臭，爆出學校容許「影子學生」存在，即係學生長期無需返學，都仍然能夠升班，而且無跟從教育局指引向局方匯報，懷疑係要用呢啲「影子學生」嘅學位騙取政府資助，學校亦涉嫌偽造文件等刑事罪行。教育局喺2月開始接到投訴，並表示當時開始進行調查，發現學校嘅管理問題，決定委託教育界人士進入學校校董會，調整校政，又向陳章萍發警告信，列出5大罪狀，要求佢出席教育局嘅聽證會，並警告佢可能會剝奪佢嘅教師註冊，令佢不能夠再擔任校長一職。

 

　　獨裁者點會就此就範，交出權力？陳章萍先喺今個星期初搵埋撐佢嘅校董及教職員召開記招，雖然人丁比較單薄，但佢一哭二鬧，指控教育局「未審先判」，嘗試反客為主，已經有金正恩嘅味道，直到噚晚，教育局證實，收到陳章萍委託律師發出嘅律師信，要求教育局進一步解釋對佢嘅指控。惡人先告狀、排除異己、喺學校營造白色恐怖、瞞騙外界校內情況，嘩，完全就係金正恩所為，你以為北韓喺好遠，原來就近在咫尺。

 

　　連日嚟，有唔少興德學校嘅老師向傳媒爆料，透露近年陳章萍治下嘅恐怖情況，但大家都會見到，佢哋都要匿名、變聲，唔會以真面目示人。見到網上有人質疑，點解呢啲教師唔可以光明磊落受訪，真正「企出嚟」？我奇怪點解會有人提出呢類質疑。告密者匿名，係為咗要保護自己，免被人秋後算帳。香港社會始終對告密者未能夠建立一種正面嘅態度看待，一旦被人知道有告密前科，就會面臨歧視、冇生計等問題，因為覺得佢「信唔過」，唔會理會佢告密針對對象係咪不公義，佢唔匿名保護自己，邊個可以保護佢？

 

　　前事可鑑，2009年臻美黃乾亨中小學被曝光註冊以及混亂醜聞，事隔幾年呢件興德事件，有教育界中人都話，呢類管理混亂問題可能只係冰山一角。教育局有冇做好監管角色？校本條例放權是否過多？教育局執行嘅視學係咪形同虛設？但同時，如何確保教育局唔會藉此機會收緊學校嘅管治自主度，以免將來可能出現嘅政治打壓？

 

　　最緊要嘅問題，教育界金正恩，會否唔只一個？莘莘學子實在唔應該活喺獨裁之下……

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇