習總襲港，紅旗飄揚，在習核心保安區之內，沒有沸沸揚揚的示威抗議聲，只有清脆利落的諂媚擦鞋聲。一大群當權者集體跪拜，爭著成為擦鞋王者，成為中國收返香港20年嘅最大成就。

 

　　先有幾堪回味嘅梁振英伉儷，喺「中國式空軍一號」前面迎接仲唔夠，一馬當先衝上飛機，想營造同習總並排落機嘅一幕，最後擦鞋唔夠50秒，就黯然落機。呢個擦鞋，睇嚟都唔合格，不過都唔緊要，都鐵定升職，怕乜。

 

　　跟住就有警務處嘅一台好戲。習總帶埋一班中聯辦高官到訪少年警訊活動中心，警務處長盧偉聰一副自信滿滿嘅樣子，企喺習總身旁，原來係因為佢哋安排咗一位臨時演員，丫唔係，係一位新移民新秀警員充當樣板人，以流利普通話向主席表忠。盧偉聰當時個樣真係非常得戚，可能係心諗「嘩，今次仲唔氹到習大大眉飛色舞？我退休後隨時好景過禿鷹，哈哈哈哈......」點知，新聞片段只見到習主席歪起頭，一臉狐疑，問咗一句「這是正式錄用的警員嗎？」政治諂媚過分著跡，就好似將一桶鞋油倒落習總個口度，任誰都吃不消。呢種擦鞋，唔太高分，但係象徵意義大於一切。行政、執法都要臣服於宗主國領導人的淫威之下，還需要談甚麼一國兩制嗎？

 

　　接下來，呢間機構嘅擦鞋力度，比起CY夫婦同警務處有點蹩腳嘅擦鞋術，可謂高班多倍，亦正正係共產黨最欣賞嘅一種──操控輿論，呢間機構就係無負美名嘅CCTVB。

　

　　CCTVB上星期五為咗喺翡翠台播放習大大參與「慶回歸」晚宴及佢對各界嘅「重要講話」，臨時抽調港台製作，多年來諷刺時弊嘅節目《頭條新聞》，而呢集嘅內容就涉及劉曉波，及嘲諷習大大。

 

　　節目調動本是平常事，但CCTVB有獨特嘅處事方式，佢哋喺當日下午5點50分播出習宴會，跟住喺2分鐘後，亦即《頭條新聞》預定播出前8分鐘通知港台，話因為要播放「突發新聞」，所以需要抽調節目，建議將《頭條新聞》放到當日凌晨或者翌日播放，港台逼於無奈，喺無正式同意及簽署節目調動同意書嘅情況下接收CCTVB嘅單方面決定。後來無線用咗15分鐘播放習宴會片段，時值6點05分，無線無播《頭條新聞》，轉而播放經順延嘅財經新聞，以及備用嘅風水節目。

 

　　本來呢件事可以用一個技術上、時間上未能配合就可以帶過，因為各大新聞台喺下午5點收到片段後，各24小時新聞台都已經喺5點10分至20分先後播放晚宴片段。而無線翡翠台就選擇繼續播卡通片，將片段攤凍半個鐘先以「特別新聞報道」方式插播。所以先令人質疑係用習講話逼走頭條新聞，營造歌舞昇平嘅氣氛。

 

　　港台製作人員工會發表聲明，批評TVB違反慣常調動節目做法及合作協議，甚至有違反需要在固定時段播放一定時數公營機構節目嘅牌照條款，亦質疑相關決定涉及政治因素。其實，正如我頭先所講，節目調動真係平常事，當初無線如果肯及早提出調動，本應雙方都唔會有今次紛爭，但係，無線後來嘅反應，就正正令大家更加相信，呢個台，已經成為CCTVB。

 

　　佢哋喺星期三發表700字聲明，駁斥港台工會嘅講法，指當時港台係「同意」將節目調到凌晨播出，跟住提出兩大論調，第一，係點名質問港台高層，係咪覺得《頭條新聞》比起「國家主席習近平」嘅講話更加重要。第二，係緊跟外交部對於合約、協議嘅最新官方立場，聲稱商營廣播機構要播港台節目嘅做法係「歷史遺留」，應該盡早中止相關安排。

 

　　噢！原來又係一次親建制機構明知故犯、公民抗命、推動法例改變嘅事件！「央視無線台」今次選擇承認今次係習近平大於一切，就係徹頭徹尾嘅政治考慮，直情係擦鞋嘅極致，將自己變成擦鞋對象一樣，放下尊嚴，忘記合作協議，無視合約精神，一切以政治考量行先。單憑CCTVB呢份700字聲明，我哋已經可以好驕傲咁宣布，「全港首個中央電視台上線啦！」CCTVB助理總經理袁志偉獲得太平紳士銜頭，真係畀低咗佢，出年應該升佢做政協，同689睇齊丫嘛！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇