《經濟不停學》美國70年代點走出滯脹？聯儲局角色好重要

　　依家啲人驚通脹，所以ibond都幾多人抽。不過高通脹率唔係難應付嘅事，事關以前自由行瘋狂湧港拉升鋪租，間接推高物價，一早已經歷過。但如果出現滯脹就慘啲，高通脹率同經濟增長放緩一齊嚟，唔係易頂㗎。 

 

　　滯脹（stagflation）最早由英國政治人物麥克勞德喺1965年嘅國會演說度提出，全寫係停滯性通貨膨脹，一個國家或地區經濟增長停滯（stagnation），但同時物價水平上升。物價上漲造成嚴重通貨膨脹（inflation），會推高生產成本，企業唔想生產咁多，炒人後失業率上升，可能會令到經濟由停滯變成衰退。

 

　　滯脹形成嘅原因有好多種，比較常見嘅有商品因素、勞動力因素同貨幣因素。同依家全球狀況比較相近嘅可能有政府貨幣政策過度擴張助長投機，產能恢復跟唔上狂印銀紙所造成嘅需求急升。

 

美國滯脹：生產放緩疊加石油危機                                     

 

第四次以阿戰爭時進攻戈蘭高地的敘利亞軍T－62。（維基百科圖片）

 

　　歷史上最著名嘅滯脹例子，喺1970年代嘅美國發生。第二次世界大戰1945年結束，戰後嘅大量投資消費需求差唔多釋放曬，第三次科技革命亦步入尾聲，美國經濟面臨轉型壓力。而日本崛起創造緊經濟奇蹟，美國工業、出口領域優勢不再，喺1971年首次出現貿易逆差。

 

　　1973年尾，第四次中東戰爭爆發，石油輸出國組織（OPEC）為咗打擊以色列同埋佢嘅支持者，決定實施石油禁運，原油價格急升導致生產成本同物價齊齊上漲。1974年美國實際經濟增速由上一年嘅5.6%大幅降至倒退0.5%，通脹率上升4﹒8個百分點至11%。

 

　　當時嘅美國政府同聯儲局都唔太知點同時催谷經濟同抑制通脹，滯脹持續咗好一段時間。結果喺1980年，時任美聯儲主席保羅·沃爾克大幅提高聯邦基準利率至最高逾16％，犧牲短期經濟增長為代價治理通脹。

 

靠咩指標去衡量有冇滯脹出現？

 

　　可以睇生產者價格指數（PPI）同消費者物價指數（CPI） 嘅趨勢嚟對比GDP增速。PPI由賣方角度衡量價格嘅變化情況，表明生產商品嘅成本係升定跌，對於分析各行業嘅潛在銷售同盈利趨勢非常有用。至於CPI衡量一籃子消費品同服務嘅加權平均價格，正常漲幅每年少過2%，當持續超過呢個數，就要開始擔心通貨膨脹。

 

　　所以之前聯儲局先要特登講明，會容忍通脹超過２％而冇任何收水行動。

 

依家出現滯脹嘅機會大唔大呢？

 

啟德新發展區多個住宅屋苑正在動工。（吳藹林攝）

 

　　經濟通資深市場分析師鄭廣復話，依家嘅通脹主要係出於ＱＥ，啲錢周圍走推高資產價格；同時銅、原油等資源供不應求，價格急升，是影響生產面的因素。

 

　　不過佢覺得就算有滯脹都只會係短期嘅，認為聯儲局會的起心肝加息壓抑通脹。

 

　　而到時投資者要面對嘅係高通脹，鄭廣復建議可以投資一啲可以抗通脹同埋提供穩定收入嘅產品，有樓收租梗係最好，如果唔係都可以買金。

 

撰文：吳藹林

 

 

 

 

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動