腫瘤驚魂（上）

　　童年時，老父傳授江湖交友技倆：「阿仔，記住，有兩類朋友，一定要認識。因人生之中，隨時要佢哋幫忙㗎 ！就是醫生及律師。你大個咗，自然會明白！」

 

先父教落，老友之中，必須有兩類專業人士——律師及醫生，因會不時需要佢地。

　

　　當時，烏卜卜，聽住先，並冇特別放上心。

　

　　終於，人越大，越清楚老父的「交友智慧」。

　

　　小弟做傳媒，因接觸面廣泛，好似乜都識多少。其實，全屬皮毛。所以，一觸及法律及醫學，即時變白痴仔。

　

　　法律方面，勿講刑事官司，就算普通民事，也不少要靠律師，簡單如買賣樓宇及立遺囑正是。

　

　　到加入傳媒，不少江湖老狐狸也會用律師信嚇你（其實可以一千幾百搞掂，好cheap）。若你冇律師朋友，一接信，可能會手都震。

　

　　但是，有料的律師睇睇封「恐嚇信」，原來可以唔理，唔答，甚至咬返對方轉頭，都幾好「玩」㗎 ！

　

　　不過，正常人，最多交往的，不是律師，而是醫生。尤其，年紀越大，就越頻密。呢樣，位位退休者及長者，必有充分體驗。

　

　　小弟當然如是。早年工作博晒老命，自然有代價。故此，心臟、血壓、眼睛、精神系統全部出過問題，須長期食藥及覆診。

　

　　幸而，退休後壓力大減，生活正常，才冇乜古靈精怪病爆出。其實，都幾憂心㗎，因身體狀況如此，冇保險公司肯受保也。

　

　　不過，久不久，仍會爆出一單杰撻撻的。2015年就先嚟一劑眼中風。

　

　　終於，上周二，又來第二劑。凌晨半夜覺得頸部現痛楚。然後，吞口水微痛，唔知乜事。翌晨一摸再照鏡。咦，乜右鎖骨上邊腫起，足有一隻小雞蛋般大。撳落，微痛。乜嚟嘅呢？

 

我上周三瞓醒，頸部出現奇怪腫脹，按下及吞口水有點痛。

　

　　傳統智慧（多數唔中），可能近期食得荔枝太多，出現「痰火核」。反正不太痛，好，忍一日，睇睇會否自動消失先。

　

　　結果，翌朝起床，「雞蛋」仍在。唔……要揾醫生嘞。好在又有醫生朋友李家仁，速速約診。

 

我的家庭醫生李家仁，廿多年來替我解決大量健康問題。

　

　　佢一睇，皺眉頭：「可大可小，可大可小。可以是耳鼻喉問題，可以是甲狀腺出問題，也可以是……惡性腫瘤，即癌症！」

　

　　我早有心理準備，於是問：「咁，點搞？」

　

　　「首先用排除法，將以上可能逐一檢查，看看可否排除！」

 

任何不良健康現象，開始排除法找原因時，第一步是驗血。

　

　　一連串檢查即時展開，執筆此刻，仍在進行中，未有答案！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇