一於全部判「死刑」！

　　退休之後，應該開始多點新思維。例如，接受「斷捨離」哲學，將一切毋須／不應留下的身邊物品，一二三送晒俾人或掉之。 

 

山下英子的「斷捨離」哲學，深得我心。

 

　　事實，人人家中都有三幾百件物品從不再用，起碼兩年內掂都冇再掂。這類物品，無論係乜（衣服鞋襪、電器裝飾、書本紀念品……），若留下，只在佔據你的生活空間，根本沒有存在意義，一於「斷捨離」可也！立定心腸斷斷斷捨捨捨離離離之後，你會有種安逸閒適的輕鬆感覺。

　

　　好嘞，咁，另外部分曾刻意珍藏的物品又如何？

　

　　大家都知有句口號：「人在天堂，錢在銀行！」，專揶揄班傻吓傻吓不懂享受人生的「孤寒鐸」，只懂儲錢而不懂花錢，結果是益晒別人！秘密的，就存在銀行天荒地老。已知的，就由後代打生打死去爭產，造福大律師。

 

「人在天堂、錢在銀行」，何其不智？傻的嗎？

 

　　所以，最精明者，就只留下夠用又安全的數目後（當然因人而異！），不停玩「財散」，多點做自己想做的事，旅遊、請客、慈善、送禮……總之，feel good就做！

 

大家皆年近七十，必須把握時間將自己努力的成果享用。仍能快樂時、就盡情快樂。

 

　　最近，我與幾位志同道合朋友，正開展一項新「判死刑」大行動。因各人在過去數十年，因投資／嗜好／虛榮……儲起不少靚酒、花膠、鮑魚、陳皮……心知肚明，能享用的日子，必定愈來愈少。咁，為乜唔全部拿出來分享？趁仍可食食食，一於全部「判死刑」，將佢哋消失！

　

　　昨天，老友「班長和」傳來一幅相，為1995年的「拉菲」紅酒（Château Lafite Rothschild）。佢收藏咗廿幾年，一直唔捨得飲。如今，六十幾歲嘞，再唔飲，真係唔知重有冇機會飲。於是，大喝一聲：「各位，幾時判佢死刑？」

 

「班長和」1995 年拉菲紅酒，下次「判刑」！

 

　　嘩！一呼百應！跟住，大家紛紛將自己珍藏的其他超陳年XO、冇年份威士忌、吉品鮑魚、天九膠、花膠王全部放在「判死刑群組」分享，興奮到爆。人人摩拳擦掌，研究俾邊個香港大廚準備「刑具」，又找邊間食肆做「刑場」……

 

吉品鮑魚、花膠扒、魚翅王，最忌是變成「主人在天堂，極品留廠房」！

陳年珍貴陳皮，下次「判刑」，煲紅豆沙！

 

　　人生，最重要追尋的，就是快樂。你博命搵錢，維持健康，交朋結友，結婚生子，行善積德……最終，都是想人生過得快快樂樂，心境祥和安寧。

 

離世時，最好是兩手空空，幾乎家無一物。

 

　　「判死刑」自己快樂，別人快樂，理應在退休後常常做呢！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇