退休「薯片叔叔」大受歡迎

#曾俊華 #退休 #理財 #薯片叔叔 #健康空氣行動 #電動巴打 #環保

　　人生的一切，我早早理解有晒劇本。一切生命中的人和事，應出現時就會出現，毋須刻意，亦毋須強求。

　　最近又一次發生我身上。

　　小弟入政府三十多年，有幾位高官，我極之「欣賞」（由下而上得唔得的呢？）。覺得若公務員生涯有機會跟到佢哋學嘢，肯定能夠自我提升。

　　其中一位，正是前財政司司長曾俊華（John）。

昔日為肥彭私人秘書，吸收大量成功民主政治人物心法

　　結果，我做到退休亦不能嚐願，冇法。

　　不過，叮！上月，竟然「天降甘霖」。有一個推動環保的NGO團體「健康空氣行動」（Clean Air Network），基於香港在減空氣污染方面，仍未成功，導致不少老弱及長期病患者健康受損，令公共醫療負擔不停增加。故此，希望督促政府在減排及零排放方面，加速制定政策，淘汰柴油及電油車，尤其公共巴士方面，更應盡早變全電動。

　　曾俊華作為前財爺，十多年前已開始策劃整個部署，但點解到今天，「同志仍未成功」呢？

　　於是，「健康空氣行動」就決定拍一條片宣揚環保訊息，並由曾俊華解釋當中遇到的難題及解決方法。製作人突發奇想，不如搞個「電動巴打」（Brother）形象，由兩個曾X華一問一答帶出背景資料，然後游說市民加入推動環保概念。