【佛系打工仔】加薪變加辛？兩成人有職不升怕冇生活！

　　以為「人望高處」係人之常理？但現實情況似乎唔係咁樣。最近JobsDB公布「2018年薪酬調查報告」，指今年有超過七成打工仔有得加人工，平均增幅有成5.7%，比去年嘅3.9%高咗少少。jobsDB香港區行政總裁仇崑石表示，經濟環境持續向好，令勞工市場更為緊張，同時帶動人工上升，估計下半年仍有加薪機會！

調查發現，今年「銀行及金融」、「資訊科技」及「市場推廣／公共關係」從業員嘅薪酬增長幅度最高，分別有8.0%、7.0%和6.4%。（《誇世代》劇照）

　　不過最令人估唔到嘅係，有兩成打工仔竟然話唔想升職，其中尤以41歲或以上的僱員為甚，有三成屬於嗰個年齡組別嘅人都表明唔願意升職！仇崑石引用數據，解釋咁樣係因為有愈來愈多打工仔唔想為錢賣命，「有64%受訪者表示『希望保持工作生活平衡。同時亦有五成人認為『工作量／工時增加與加薪幅度不相符』，以及有超過兩成人『害怕上司／老闆對自己期望增加』。所以，僱主嚟緊應該要諗方法改善員工嘅工作環境，而唔係再單用加人工同花紅嚟挽留人才。」

仇崑石（右）估計，女性（24%）唔想升職嘅比例比男性（16%）高，係因為大部分女性都需要同時兼顧家庭。

　　至於其餘八成受訪者中，有近九成人表示升職只為「加薪」。同時有超過六成人認為升職係代表「公司對自己工作表現的肯定」，三成多人希望借升職嚟「獲得更多福利（如增加年假／提升員工保險計劃）」。

　　而有趣嘅係，呢班受訪者話，為咗升職，佢哋試過「主動爭取工作機會」（51%）、「進修」（36%），同埋「瘋狂加班」（19%），甚至「積極參與公司活動」（19%）、「更注重外表」（13%）、「奉承上司／同事」（7%）、「替上司／同事辦私人事務」（6%）等。

　　不過仇崑石提醒一班打工仔，香港係一個講求工作效率嘅地方，瘋狂開OT反而有機會令僱主以為你工作能力不足，結果得不償失。所以大家要切記，千祈咪盲目相信為公司付出更多時間、表現忠心就係升職嘅「潛規則」！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情