【從來沒我份】預算案得個桔！到底是考DSE好，還是去海洋公園好？

　　話說打工仔大慨從來都無用心聽過一次財政預算案，年年剩千億盈餘，但好似次次啲政策都無點惠及到一班小薯。話說，財爺昨日又公布新一份財政預算案，今次同樣有驚無喜，全民派錢當然冇，連基本生活的補貼，例如水費、電費、交通津貼通通都冇，但綜援就出三糧、考DSE就免費一年，仲送海洋公園飛，小薯真心想講一句「咁都得？」如果拎綜援可以年年出三糧，打工仔就日日捱OT，人工加少少，花紅又出少少，交稅又無咗一個月糧，咁辛苦又為啲嘜？

 

 

　　講到幫2019年考DSE的考生代繳考試費，就用上了1億8千萬，仲要不限年齡，不論自修生或學生考生都可受惠，實在太令打工仔鼓舞，不少人都表示有考慮一試考DSE的滋味，看看自己各方面的能力有冇倒退，畢竟其實今次的考試費你地都有份出……

 

 

　　最有意外驚喜一定數到送海洋公園飛，政府未來數年會合共撥款3.1億支持海洋公園發展教育旅遊項目，為惠及本地學生，更向本地中小學生提供1萬張免費入場券。財爺表明措施是「表達對青年人關顧」。打工仔們，你地何嘗沒有年輕過？若果俾你免費入一次海洋公園玩，你感覺會否良好一點？不過睇真啲，以現時全港學生數目計算， 67個學生爭1張飛，隨時難過考大學。更莫說，計落每張票成本就要3萬，打工仔都是自己買票划算得多！

 

 

　　打工仔關心的住屋問題，今年繼續沿用舊文，冇任何壓制樓價的措施，冇公屋免租，樓價繼續升，劏房問題持續。不過，中低層的打工仔都有機會受惠，薪俸稅稅階由4.5萬擴闊至5萬，由4個稅階增至5個，邊際稅率調整為2%、5%、10%、14%及17%，仲有增加子女基本及額外免稅額，以及供養父母或祖父母免稅額。

 

　　今次的預算案，大家聽完有咩感覺？嗯……不如都係努力工作啦！

 

（截圖自《幕后玩家》）

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】東南亞藝術市場是下一個熱點？一探各地獨特及吸引之處！► 即睇