離職面試是公式行為？只要拿捏得宜對公司大有幫助！有哪些盲點值得員工和人事部注意？

　　愈來愈多公司開始採用離職面試（Exit Interview），希望透過該面試更了解員工辭職嘅真正原因，繼而填補公司、人事或管理層中間嘅漏洞，減少流失率。可能好多打工仔甚至人事部員工都會覺得，離職面試只係一個公式行為，對雙方都並無用處。但其實當中有啲面試盲點，係非常值得離職員工或人事部員工注意。

員工離職後，面試仲未完結

　　一個較完善離職面試，除咗員工離職當日嘅面試外，員工離開後仍有工作更進。當遇到優秀員工辭職，如有辦法能夠令佢哋他日「回巢」的話，先係最好結局。如果優秀員工辭職原因並非好大問題，可能只係想轉換下環境，或者係同公司某啲事情「timing」唔太配合等等的話，人事部應當更要專注佢哋往後去向，捉緊每個機會。有外國公司會於該員工離職後繼續保持聯絡，最長會長達一年多，期間會不定期了解佢哋嘅工作近況，亦會俾對方知道公司仍然歡迎佢回歸。而員工去到新公司工作時，首三個月／試用期內其實最為不穩定。可能會同新公司工作文化未能配合、工作範圍或工作量有落差、人事問題等，員工會同舊公司作對比，而舊公司一句問好就有可能令該員工回歸。又或者一、兩年後，該員工從其他公司學有所成回歸，必定成為公司最好嘅資產。

忽略辭職後、離職前嘅情況

　　員工遞信當日，正常情況下上司必定會同該員工了解情況，更會作「一定程度」嘅挽留。但當挽留無效，或員工講出一啲「唔啱聽」嘅說話時，上司嘅反應有機會會180度轉變，覺得該員工背叛自己、繼而反目，其後更可能會不停單單打打。又或者上司心感留唔住嘅員工已經再無價值，唔希望再投放時間同心機，一心只諗如何喺最後時間用盡該員工，而會額外加重其工作量、唔畀請假等等。另一方面，員工遞信後亦有可能會開始「hea做」、「按章工作」，更有極端例子，遞信後開始「搞破壞」。

　　雙方報復性心態在所難免，而人事部往往只懂以員工離職原因為核心，而忘記佢哋離職前所發生嘅事情。其實離職面試時談及「遞信後的事」更為重要，一來員工「食完死貓」有得申冤，二來公司亦可以更了解該上司是否有管理問題。但有一點離職員工需要注意，受咗幾多冤屈、有幾忿怒都好，要謹慎同中立去表達事情。記緊呢個並非發洩大會，凡事留一線，始終之後搵工時，新公司更有可能聯絡舊公司查詢，免得令自己留有手尾。

　　職場上永遠無一世敵人，只有永恆利益。其實離職面試並不是一種公式嘅過程，反而給予相方長遠嘅一個機會，只要大家都能夠拿捏得宜，就能成為一個商機。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情